Ońtústik Qazaqstan oblysynda aldaǵy ýaqytta memlekettik-jekeshilik áriptestigi aiasynda jalpy quny 4,7 mlrd. teńgeni quraityn 7 nysan boi kóteretin bolady. Qazirdiń ózinde 2 balabaqsha men 500 oryndyq emhananyń qurylys jumystary bastalyp ketken. Budan bólek, 11 jobaǵa konkýrs jariialanypty. Búgin bul týraly oblystyq ákimdikte ótken jiynda oblystyq ekonomika jáne biýdjetti josparlaý basqarmasynyń basshysy Arman Sábitov málim etti.
Aita keteiik, Ońtústik Qazaqstan oblysy búginde jalpy respýblika boiynsha memlekettik-jekeshilik áriptestigi aiasynda jobalardy iske asyrýda 5-orynǵa turaqtapty. Sondai-aq óńir basshysy atalǵan jobalardy iske asyrý maqsatynda úgit-nasihat jumystaryn barlyq sala basshylary men máslihat depýtattaryna tapsyrdy.
«Qazirgi tańda Elbasymyz elimizdegi kásipkerlikti damytý jolynda barlyq jaǵdaidy jasap otyr. Sonyń biri - memlekettik-jekeshilik áriptestikti damytý. Bul qoǵamda mańyzdy jobalardy júzege asyrýǵa jeke investitsiialardy tarta otyryp tiimdi basqarýǵa, sondai-aq memlekettik qyzmetterdi jeke sektorǵa berýge baǵyttalǵan memleketpen jeke biznes arasyndaǵy yntymaqtastyq bolyp tabylady. Sondyqtan úgit-nasihat quraldaryn kóptep shyǵaryp, kásipkerlerge túrli salalardaǵy birlesip atqaratyn jobalardy usynyp otyrý qajet», - dedi Janseiit Qanseiituly.
Basqarma basshysynyń aitýynsha, jalpy ákimdiktiń bastamasymen 34 jobany memlekettik-jekeshelik áriptestik tetigi arqyly iske asyrý josparlanǵan. Zań talaptaryna sáikes tiisti qujattary rásimdelgen 18 jobanyń tizbesi oblystyq máslihatpen bekitilipti.
«Biylǵy jyly 34 jobanyń 11-ine konkýrs jariialandy. Onyń 1-ýi bilim, 3-eýi sport nysany. Baiqaý qorytyndysy 4 - tamyz aiynda anyqtalady. 4 jobanyń konkýrstyq qujattamalary ázirlený ústinde. Tiisti saraptama qorytyndylary alynǵannan keiin tizbesin bekitý úshin oblystyq máslihattyń qaraýyna usynys beriletin bolady. Budan bólek, 12 jobanyń tujyrymdamasy daiyndalyp, jyl sońyna deiin tiisti saraptama qorytyndylaryn alý kózdelip otyr»,- dedi Arman Sábituly.
Óńir basshysy memlekettik-jekeshilik áriptestikti damytý maqsatynda oblysymyzda memleket tarapynan bólinetin 95 mlrd. teńgeniń kólemindegi jobalardy ázirleýge shaqyrdy. Bul rette ákim balabaqshalar men sport keshenderin, fýtbol alańshalary jáne otbasylyq, stýdenttik jataqhanalardyń qurylys júrgizýge keńes berdi.
