QMDB-nyń tóraǵasy, Bas múfti Erjan qajy Malǵajyuly Ońtústik Qazaqstan oblysy Ordabasy aýdany Shubarsý eldi mekeninde kóp balaly 4 anaǵa úidiń kiltin tabys etti, dep habarlaidy "Ult aqparat".
Sharany Qazaqstan musylmandary dini basqarmasynyń Ońtústik Qazaqstan oblysy boiynsha ókildigi men oblystyq «Zeket» qory birlesip uiymdastyrǵan bolatyn.
«Dini basqarma jaǵdaiy tómen, kóp balaly, altyn qursaqty analar men ómir taýqymetin tartqan otbasylarǵa úi salyp berý jumysyn dástúrli túrde júrgizip keledi. Biylǵy jyly Ońtústikte 8 úi salyndy. Bul sharalarǵa din qyzmetkerleri men jergilikti qoly ashyq jomart jandar demeýshilik jasady. Mundai igi ister jyl saiyn jalǵasyn tabatyn bolady», - dep atap ótti Bas múfti.
QMDB tóraǵasy qaiyrymdylyq shara kezinde 4 otbasyǵa azyq-túlik, úi jihazdary men ózge de turmystyq zattardy tartý etti.
Jalpy, árbir otbasyǵa bólingen jer telimi 8 sotyq, salynǵan ár úidiń kólemi 120 sharshy metr. Aýyz sýmen qamtamasyz etý maqsatynda 280 myń teńgege ár úige qosymsha jerasty qudyq sýy tartyldy. Sonymen qatar, 273 myń teńgege bir shaqyrym jerden 15 baǵana ornatylyp, elektr jaryǵy tartyldy. Salynǵan ár jeke úige 7 mln teńge kóleminde qarajat jumsaldy.
Bas múfti asyl dinimizdiń órkendeýine jan-jaqty úles qosyp, halyqtyń áleýetin kóterýge atsalysyp kele jatqan jergilikti qaiyrymdy jandarǵa airyqsha alǵysyn jetkizdi.
