Ońtústik Qazaqstan oblysynda 2021 jylǵa qarai halyqtyń 95,5 paiyzy gazben qamtylady, dep habarlaidy "Ult aqparat" ákimniń baspasóz qyzmetine silteme jasap.
Atalǵan meje 2017-2021 jyldarǵa arnalǵan oblystyń eldi mekenderin gazdandyrýdyń jospary negizinde júzege asady. Bul týraly oblys ákimdiginde ótken kezekti májiliste oblystyq energetika jáne turǵyn úi-kommýnaldyq sharýashylyǵy basqarmasynyń basshysy málim etti.
«Jalpy oblys halqy jylyna 1,1 mlrd.m3 tabiǵi gaz tutynady. Onyń 840 mln.m3 qys maýsymynda, al 293 mln.m3 jaz maýsymynda. Bizdiń óńir tabiǵi gazben 3 baǵyt arqyly qamtamasyz etiledi. Olar: Ózbekstan Respýblikasynyń «Gazli-Shymkent» jáne «BGR-TBA» magistraldy gaz qubyrlary, otandyq «Beineý-Bozai-Aqbulaq» magistraldy gaz qubyry, Túrkmenstan Respýblikasynyń «Qazaqstan-Qytai» tranzittik magistraldy gaz qubyrlary», - dedi Marǵulan Zulharnaiuly.
Odan bólek, basqarma basshysy Shymkent qalasy aýmaǵynda 509 nysan gaz qubyrlaryn qorǵaý aimaǵy shegin buzyp ornalasqandyǵyn jetkizdi. Bul óz kezeginde sol mańda ornalasqan ǵimarattar men turǵyndardyń ómirine eleýli qaýip týǵyzyp otyr.
Májiliste sóz alǵan oblys ákimi eń birinshi kezekte jylytý maýsymyna daiyndyq jumystaryn taǵy da pysyqtap, tótenshe jaǵdailardyń oryn almaýyna mán berýdi júktedi.
«Shymkent qalasyn qysqy maýsymǵa daiyndyq jumystaryn tolyq qadaǵalaýda ustaý kerek. Sondai-aq, tótenshe jaǵdailardy aldyn alýǵa mán bergen jón. Ózderińizge málim, biylǵy jyly 8 qańtarda gaz júiesi aqaýynan jarylys bolǵanyn. Al endi qys aldymyzda kele jatyr, osyǵan orai basqarma jáne ákimshilik birlesip avtomatty jylytý júieleri ornatylǵan turǵyn úilerge túgendeý jumysyn júrgizsin. Ekinshiden, gaz quraldarynyń qaýipsizdigin tekseretin tehnikalyq inspektsiia qurylýy tiis», - dedi ákim.
Halyqtyń qaýipsizdigi basty nazarda bolý kerek ekenin aitqan aimaq basshysy árbir basshy óz fýnktsionaldy qyzmetterin durys atqarý talap etiletinin jetkizdi.
Odan bólek, ákim Saryaǵash, Maqtaral, Tólebi aýdandarynda birqatar mektepterdiń jylý júiesi gazǵa aýyspaǵanyn aityp. Bul boiynsha aýdan, qala ákimdikterinde arnaiy komissiia qurylyp, jumystyń oryndalýyn baqylaýdy tapsyrdy.
Aita keteiik, oblysta jylý berý maýsymyna daiyndyq jumystary sáýir aiynan bastalǵan. Aýdan, qala ákimdikteri men oblystyq basqarmalardyń málimetine sáikes, barlyq daiyndyq jumystary 100 paiyz oryndalyp otyr.
Kómir baǵasyn turaqtandyrý boiynsha basqarma tarapynan kómir jetkizýshi mekemelermen kelissózder júrgizilgen. Nátijesinde satylý baǵasyn Maikóbe kómiriniń 1 tonnasyn 12500 teńgege, al Shubarkól kómirin 13 myń teńgege deiin tómendetýge qol jetkizilip otyr.
