Ońtústik Qazaqstan oblysynyń ákimi Janseiit Túimebaev «Phoenix Global» kompaniiasynyń TMD jáne Orta Aziia elderi boiynsha aimaqtyq direktory Ashil Kaýl bastaǵan delegatsiiamen kezdesti. Taraptar kezdesý barysynda aýyl sharýashalyǵy salasyn damytý baǵytyn talqylady, dep habarlaidy "Ult aqparat".
Óz kezeginde Ashil Kaýl myrza óńir basshysyna kompaniianyń aýyl sharýashylyǵyn damytý baǵytyndaǵy atqaryp otyrǵan jumystaryn baiandap berdi.
«Bizdiń kompaniia aldaǵy ýaqytta jemis-jidek jáne kókónis klasterin damytýǵa erekshe mán berip otyr. Osy rette Ońtústik Qazaqstan oblysynyń aýyl sharýashylyǵy salasyndaǵy áleýeti qyzyqtyrýda. Bizdiń kompaniia 2016 jyldan beri aýyl sharýashylyǵy salasynda eleýli eńbek etip, ónimdi saqtaý ári alǵashqy óńdeýden ótkizý isimen ainalysyp keledi. Qazaqstanda 42 myń 204 gektarǵa jýyq jerimiz bar. Onda negizinen bidai, arpa egilip, jem-shóp azyqtaryn daiyndaý salasyna basymdyq berilip otyr», - dedi «Phoenix Global» kompaniiasynyń aýmaqtyq direktory Ashil Kaýl myrza.
Atalǵan kompaniianyń álemdik aýyl sharýashylyǵyn damytýda da qosyp otyrǵan úlesi orasan. Tek qana bidai egý ǵana emes, kúrish ósirý, ósimdik maiyn óndirý isimen de ainalysady. Sondai-aq fermerlik sharýashylyqty damytyp, baý-baqsha, gúl ósirý isinde de jetken jetistikteri az emes.
Kompaniianyń múmkindikterine qanyqqan óńir basshysy qonaqtarǵa oblystaǵy aýyl sharýashylyǵy salasyndaǵy jetekshi sektorlardy áńgimelep berdi. Sondai-aq aldaǵy ýaqytta yntymaqtastyq negizde birlese jumys isteýge ázir ekenin jetkizdi.
«Ońtústik Qazaqstan oblysy - agrarly óńir. Óńirde sýarmaly egistik kólemi 466 myń gektarǵa jýyqtaidy. Osy rette sizderdiń kompaniialaryńyzdyń áleýeti kóńil qýantyp otyr. Aldaǵy ýaqytta oblys ákimdigi men kompaniia yntymaqtastyqty arttyryp, birlesken investitsiialyq jobalardy júzege asyrýǵa bolatynyna senim mol», - dedi Janseiit Qanseiituly.
Kezdesý sońynda taraptar estelikke sýretke túsip, syi-siiapat almasty.
