Búgin Ońtústik Qazaqstan oblysynyń ákimi Janseiit Túimebaev óńirdiń ardager ustazdary men bilim salasynyń mamandaryn tól merekelerimen quttyqtap, marapattady, dep habarlaidy "Ult aqparat".
Jiyn barysynda Janseiit Qanseiituly 9 ardager ustaz ben 26 muǵalimge alǵys hat tabystady.
«Ustazdardyń kásibi merekesi - halyqtyq mereke. Álemdegi ár adamǵa bilim berip, mamandyq tańdaýmen qatar ómir jolyna baǵyt beretin - Ustaz. Endeshe, tól merekelerińiz qutty bolsyn, qurmetti ustazdar! Elbasymyz atap ótkendei, qazaqstandyqtardyń eshqashan buljymaityn eki erejesiniń birinshisi - ulttyq kod pen ulttyq mádeniettiń saqtalyp, rýhani jańǵyrýdy iske asyrýda ustazdardyń róli birinshi kezekte turǵany anyq. Bala júregine jol taba biletin, rýhani azyq beretin de - ustaz. Tek naǵyz ustaz ǵana egemen elge laiyqty urpaq tárbielei alady. Buǵan oblys ustazdarynyń búgingi tańdaǵy shynaiy eńbekteri dálel. Ustazdarymyzdyń eńbek joly - árdaiym jastarymyz úshin óshpes úlgi!» - dedi Janseiit Túimebaev.
Budan keiin oblys ákimi ustazdarmen taqyryptyq áńgime, suraq-jaýap, jańartylǵan bilim baǵdarlamasy men tájiribe almasý syndy taqyryptarda áńgimelesti. Ardager ustazdar da óz pikirlerin bildirip, aimaq basshysynyń quttyqtaýyna alǵystaryn bildirdi.
«Bizde bilim berýge barlyq jaǵdai jasalǵan. Múmkindikter qarastyrylǵan. Balabaqshalar da, mektepter men kolledj, joǵary oqý oryndary da jetkilikti. Myqty mamandarymyz da bar. Tek endi jas urpaqqa sapaly bilim berip, sanaly urpaq tárbielep shyqsaq bolǵany», - dedi ardager ustaz Sailaýkúl Barahova.
Aita keteiik, búginde kúngeide 638 myń oqýshyǵa 70 myńǵa jýyq muǵalim sabaq beredi. Oblys deńgeiindegi bilim salasynda ilgerileýshilik bar. Óńirdiń daryndy oqýshylary respýblikalyq, halyqaralyq deńgeidegi bilim saiystarynda júldeger atanýda. Jalpy bilim beretin pánderden respýblikalyq olimpiadada oblys komandasy birneshe jyl boiy «Eń úzdik olimpiadalyq komanda» atalymy men I, III júldeli oryndardy ielendi. Biylǵy tamyz keńesinde tájiribeli ustazdarǵa páter kiltteri men bilim jáne ǵylym ministrliginiń alǵys hattary, qurmet gramotalary tapsyryldy. Sonymen qatar Maqtaaral aýdanyndaǵy «Daryn» mektep-internaty men Qazyǵurt aýdanyndaǵy J.Qapparov atyndaǵy fizika-matematikalyq mamandandyrylǵan mektep-internaty respýblikadaǵy eń úzdik bilim uiymdarynyń ondyǵyna endi.
