Ońtústik Qazaqstan oblysynda memlekettik qyzmetke maman tańdaýda damyǵan elderdiń tájiribesi keńinen qoldanylatyn bolady. Bul rette álemdik tájiribede keń qoldanylatyn «Talanttardy basqarý» ádisiniń bereri mol. Búgin bul týraly bir top memlekettik qyzmetkerlermen kezdesken Ońtústik Qazaqstan oblysynyń ákimi Janseiit Túimebaev málim etti, dep habarlaidy "Ult aqparat".
Kezdesý barysynda memlekettik qyzmetshiler óńir basshysyna biliktilikti jetildirý, áleýmettik jaǵdaidy kóterý, yntalandyrý máseleri boiynsha óz usynystaryn aityp, emin-erkin pikir almasty.
«Memlekettik qyzmetker bolý – ońai sharýa emes. Óitkeni bul óte jaýapty is. Bul jolda árbir qyzmetkerdiń kásibiligimen qatar biliktiligi, bilimdiligi, adaldyǵy men ar-ojdany taza bolýy kerek. Sonda ǵana elge sapaly qyzmet kórsete alasyzdar», - dedi Janseiit Qanseiituly.
Aita keteiik, búginde jergilikti bilik kadr tańdaýda «úzdikterdi» konkýrsqa qatysýshylar arasynan izdeý siiaqty úirenshikti ádiske ǵana júginbei, álemdegi damyǵan elder úlgisimen «talanttardy basqarý» ádisin paidalanýdy qolǵa alǵan. Sonyń nátijesinde sapaly mamandar qatary artyp, memlekettik qyzmet kórsetý sapasy da edáýir jaqsaryp keledi. Qazirgi tańda Ońtústik Qazaqstan oblysyndaǵy jergilikti atqarýshy organdarda 4573 memlekettik ákimshilik laýazym iesi qyzmet etedi. Onyń 1122-si áiel azamattar. Óńirdegi memlekettik qyzmetshilerdiń ortasha jasy 39 quraidy.
Ótken jyly oblysymyzda «Bolashaq» baǵdarlamasynyń jáne Memlekettik basqarý akademiiasy túlekterin memlekettik qyzmetke tartý jónindegi tiimdi is-sharalar qolǵa alynǵan bolatyn. Qazirdiń ózinde jergilikti atqarýshy organdar qyzmetshileriniń qatarynan 7-i «Bolashaq» baǵdarlamasy boiynsha, al 3-i Akademiiada bilimderin jetildirýde.
Sharany qorytqan óńir basshysy osyndai kezdesýlerdi aldaǵy ýaqytta turaqty túrde ótkizip otyrýǵa keńes berdi.
