Ońtústik Qazaqstan oblysynyń ákimi Janseiit Túimebaev «Jas Otan» Jastar qanatynyń IV Sezi aiasynda «Jastar Otanǵa!» saiasi lagerine arnaiy qatysý úshin kelgen kóshbasshy jastarmen dóńgelek ústel basynda kezdesti, dep habarlaidy "Ult aqparat" ákimniń baspasóz qyzmetine silteme jasap.
Kezdesýge respýblikalyq «Jas Otan» jastar qanatynyń tóraǵasy D.Súndetbaev, QR Din isteri jáne azamattyq qoǵamy ministrliginiń din máseleleri jónindegi ǵylymi-zertteý jáne taldaý ortalyǵy direktorynyń orynbasary Turar Ábýov, Qazaqstannyń estrada juldyzy Qairat Nurtas, jýrnalist, telejúrgizýshi Ashat Sadyrbai, Garvard biznes mektebiniń túlegi, «Bolashaq» qaýymdastyǵynyń múshesi Danat Jýmin, 22 jeńilissiz jekpe jek ótkizgen kásipqoi boksshy Janhosh Turarov, «Global Business Forum» uiymynyń direktory Ásel Sydyqova, birqatar oblystardaǵy «Jas Otan» jastar qanatynyń tóraǵalary qatysty.
Elimizdegi jastardyń basym kópshiligi iaǵni, 800 myńdai jastar turatyn Ońtústik óńirinde «Jastar Otanǵa!» saiasi lageriniń ótýi oblys jastary úshin óte mańyzdy ekenin aitqan aimaq basshysy, elimizdiń erteńi jastarǵa aǵalyq aqylyn aitty.
«Búgin Ońtústik Qazaqstanda Qazaqstannyń barlyq aimaqtarynan elimizdiń bolashaq tirekteri, búgingi jas kóshbasshylar bas qosyp jatyrsyzdar. Onda óz aqyl-keńesterińizben bólisip, jastar saiasatyn jetildirý joldaryn talqylaidy dep senemin. Sebebi, Sizderge halyq pen Elbasy úmit artyp otyr. Sonymen qatar, árbirińiz Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasyn jatqa bilýlerińiz kerek, ol barlyǵyńyz úshin uran bolýy qajet. Sondai-aq, búgingi jastar jyltyr, jattandy jalań sózderden arylyp, shynaiy sóileýdi úirenýi qajet. Ol úshin bilim alyp, tarihymyzdy jatqa oqyp bilýlerińiz kerek. Sebebi, jastary belsendi eldiń erteńi jarqyn. Sondyqtan, olar qazir qoǵamdaǵy barlyq salaǵa atsalysyp, táýelsizdiktiń tuǵyrly bolýy jolynda aianbai eńbek etýi qajet», - dedi ákim.
Basqosýda jastar ózara pikir almasyp qana qoimai, Qazaqstandaǵy jastardyń búgingi jai-kúii týraly sóz qozǵap, oblys ákimine jastardy jumyspen qamtý boiynsha birqatar usynystaryn jetkizdi.
Munan bólek, kezdesýge qatysyp otyrǵan jastar Qazaqstannyń ósip-órkendeýi jolynda aianbai eńbek etetinderin oǵan barsha jastardy shaqyratyndyqtaryn jetkizdi.
Kezdesýdi qorytyndylaǵan oblys ákimi búgingi taza aýada ótetin jastar basqosýynyń oblys jastaryna bereri mol mazmundy kezdesý bolatynyna senim artyp, jiynnyń sátti ótýine tilektestigin bildirdi.
Aita keteiik, Tóle bi aýdanyndaǵy «Alma-Taý» demalys aimaǵynda ótetin kezdesýge barlyq óńirlerdegi «Jas Otan» jastar qanatynyń tóraǵalary men belsendileri, saiasattanýshy, kásipker, sportshy, ánshi jáne jastar saiasaty salasynyń ókilderi jalpy sany 120-dan astam jas qatysatyn bolady. Osy kezdesýde keleli máseleler aitylyp, jastar saiasatyn damytýdaǵy oń pikirler men usynystar ortaǵa salynbaq.
