Búgin Ońtústik Qazaqstan oblysynyń ákimi Janseiit Túimebaev Germaniia Federativti Respýblikasynyń Qazaqstandaǵy tótenshe jáne ókiletti elshisi Rolf Mafaelmen kezdesti, dep habarlaidy ákimniń baspasóz qyzmeti.
Kezdesý barysynda qos tarap ózara yntymaqtastyq tetikteri jaiyn talqylap, ekijaqty qatynastardy damytý týraly pikir almasty.
Óńir basshysy Germaniiany Qazaqstannyń Eýropadaǵy saiasi jáne ekonomikalyq áriptesi dep sanaityndyǵyn, barlyq salada yntymaqtastyq bailanysty damytýǵa yntaly ekendigin jetkizdi. Sondai-aq, ákim biylǵy jyldyń 9 aiynda Ońtústik Qazaqstan oblysy men Germaniia arasyndaǵy taýar ainalymy 30 mln AQSh dollaryna jetip, onyń 27 mln dollaryn import qurap otyrǵanyna toqtaldy.
«Germaniia - Qazaqstannyń negizgi saýda áriptesi. Ekijaqty qarym-qatynastar tájiribesi Germaniianyń senimdi seriktes ári turaqty investor ekendigin ańǵartady. Biz germaniialyq investorlardyń jańa tehnologiialar ákelip birlesken óndiris oryndaryn ashý úshin bar múmkindikterdi jasaýǵa daiynbyz. Búginde óńirimizde investorlarǵa tiimdi jaǵdailar jasalyp otyr. Ońtústik Qazaqstan oblysynyń geografiialyq turǵydan tiimdi ornalasýy - aimaǵymyzǵa investitsiia tartý úshin oń jaǵdaidy qalyptastyrady. Men osy rette germandyq kásipkerlermen tyń jobalardy iske asyrýǵa múddeli ekendigimizdi jetkizgim keledi. Sondyqtan sizderdi ekonomikamyzdyń túrli salasynda birlesip eńbek etýge shaqyramyn», - dedi Janseiit Qanseiituly.
Óz kezeginde nemis elshisi Ońtústik Qazaqstan oblysy Eýroodaq elderiniń qyzyǵýshylyǵyn oiatqan ekonomikalyq aimaq ekenin atap ótti.
«Biyl Qazaqstan men Germaniianyń arasynda diplomatiialyq qatynastyń ornatylǵanyna 25 jyl tolyp otyr. Búginde biz qazaq-nemis qatynasy joǵarǵy damý deńgeiine jetkeniniń kýási bolyp otyrmyz. Eki el arasyndaǵy yntymaqtastyqty arttyrýda Ońtústik Qazaqstan oblysynyń da qosyp otyrǵan úlesi mol. Sizderdiń óńirlerińiz agrarlyq aimaq sanalǵandyqtan aldaǵy ýaqytta osy jáne mádeniet, bilim, densaýlyq saqtaý salalaryndaǵy yntymaqtastyqty arttyrýǵa kúsh salatyn bolamyz», - dedi Rolf Mafael.
Aita keteiik, búginde Ońtústik Qazaqstan oblysynda germaniialyq áriptesterdiń qatysýymen birqatar óndiris oshaqtary jumys isteidi. Olardyń qatarynda «Promondis Kazahstan», «ODDESSEZentralsien» JShS-lary men «Shymkenttsement» AQ da bar.
Kezdesý barysynda oblys ákimi elshige Elbasynyń «Bolashaqqa baǵdar: rýhani jańǵyrý» baǵdarlamasy aiasynda óńirimizde týrizmdi damytýǵa erekshe kóńil bólinip otyrǵanyn jetkizdi. Osy rette óńir basshysy nemistiń uly aqyny Gete men qazaqtyń uly kemeńgeri Abaidyń rýhani bailanysyna toqtalyp, Geteden aýdaryp, ánge ulastyrǵan qazaq aqynynyń «Qarańǵy túnde taý qalǵyp» óleńin jatqa oqyp berdi. Sondai-aq ákim eki el arasyndaǵy mádeni bailanystardy nyǵaitý maqsatynda aldaǵy ýaqytta Shymkentte Gete atyndaǵy saiabaqtyń irgetasy qalanatatynyn jetkizdi.
