Búgin Ońtústik Qazaqstan oblysynyń ákimi Janseiit Túimebaev Frantsiianyń Qazaqstandaǵy Tótenshe jáne Ókiletti Elshisi Filipp Martinemen kezdesti. Kezdesý barysynda taraptar ózara áriptestik mehanizmderin talqylap, eki jaqty qarym-qatynasty damytý jóninde pikir almasty, dep habarlaidy óńirlik ákimdiktiń baspasóz qyzmeti.
Qazaqstan men Frantsiia arasynda túrli salada tyǵyz bailanys ornap, damyǵanyn aitqan aimaq basshysy eki eldiń saýda-ekonomikalyq áriptestik bailanysy boiynsha 5-orynda keletinin atap ótti.
«Qazaqstan negizinen munai, metall men metall ónimderin, himiialyq ónimder, aýyl sharýashylyǵy azyq-túligin eksporttaýda. Al Frantsiiadan memleketimiz elektrondy jáne mehinikalyq jabdyqtar, tutynýshylyq taýarlar, dári-dármek pen kosmetika, avtokólikter, taǵam ónimderi men qurylys materialdaryn importtaidy. Frantsiianyń Qazaqstan ekonomikasyna 2005 jyldan bastap 2016 jyldyń jartysyna deiin quiǵan qarjysy 12,7 mlrd dollardy qurady. Bizdiń elimizde frantsýz kapitaly bar 135 kásiporyn jumys isteýde. Olardyń arasynda «Total», «Areva», «Danon», «Vikat», «Pejo», «Alstom» jáne basqa da kompaniialar bar»,- dedi Janseiit Túimebaev.
Budan bólek, oblys ákimi óńirde investorlarǵa qolaily jaǵdai jasalǵanyn atap ótip, Ońtústik Qazaqstan oblysy túrli salada qarym-qatynasty damytýǵa ázir ekenin jetkizdi.
Óz kezeginde frantsýz elshisi OQO men Frantsiia aimaqtary arasyndaǵy ózara tiimdi saýda-ekonomikalyq, investitsiialyq, sondai-aq, mádeni-gýmanitarly áriptestikti damytýdyń áleýeti zor ekenin aitty.
«Eki el arasyndaǵy iskerlik qarym-qatynasty odan ári damytý maqsatynda bizdiń aimaqtar arasynda import jáne eksporty kóp salalardy anyqtaý baǵytynda birge jumys jasaýdy usynamyn. Sol salalar boiynsha birikken jańa óndiris oryndaryn ashýǵa bolady dep oilaimyn. Biz ózara áriptestigimizdi uzaq merzimde jalǵastyrýǵa senemiz, - dedi Filipp Martine.
Frantsiia búgingi tańda damyǵan indýstrialdy-agrarly el sanalady. Bul el óndiristik ónerkásip kólemi boiynsha álemde aldyńǵy qatarda keledi. Máselen, óńdeý ónerkásibiniń mashina jasaý, avtokólik jasaý, elektr-tehnikalyq jáne elektrondy óndiris, aviatsiia, keme jáne stanoktar jasaý sekildi salalary jaqsy damyǵan. Sondai-aq, Frantsiia - álemdegi eń iri himiialyq jáne munai himiialyq ónimder, qara jáne tústi metall shyǵarýshy memlekettiń biri sanalady.
Ońtústikke jasaǵan sapary barysynda Frantsýz elshisi men Frantsýz aliansy prezidentiniń qatysýymen Frantsýz aliansynyń inaýgýratsiiasy ótedi dep josparlanýda. Elshi buǵan qosa oblystaǵy ýran óndirý kásiporyndarynyń jumysymen tanysatyn bolady.
