Ońtústik Qazaqstan oblysynyń ákimi Janseiit Túimebaev Dúniejúzilik banktiń Qazaqstandaǵy turaqty ókili Ato Braýnmen kezdesti. Ekijaqty kezdesý barysynda Ońtústik Qazaqstan men Dúniejúzilik bank arasyndaǵy yntymaqtastyqtyń ózekti máseleleri talqylandy, dep habarlaidy OQO ákimdiginiń baspasóz qyzmeti.
Óz kezeginde óńir basshysy Qazaqstannyń álemniń básekege qabiletti 30 eliniń qataryna kirý boiynsha oblysta shaǵyn kásipkerlikti jan-jaqty qoldaý jáne jańadan jumysyn bastaǵan biznes sýbektileriniń bastamalaryna qarjylyq qoldaý kórsetý sharalary baǵytynda tiisti jumystar júrgizilip jatqanyn atap ótti.
«Bizdiń oblys Qazaqstandaǵy halqy tyǵyz ornalasqan agrarly aimaq. Elimizdegi ár besinshi sábi osy óńirde dúniege keledi. Ońtústik Qazaqstan oblysy shaǵyn jáne orta kásipkerliktiń damýy boiynsha oblystar arasynda birinshi orynda keledi. Sonymen qatar oblysymyz bilim berý men densaýlyq saqtaý mekemeler sany jaǵynan da alda. Al bul salada atqarylar jumysta az emes. Sondyqtan Dúniejúzilik bankpen aldaǵy ýaqytta da turaqty jumys isteýge ázirmiz, - dedi ákim.
Ońtústik Qazaqstanǵa úsh kúndik jumys saparymen kelgen mártebeli meiman óńirde atqarylyp jatqan ilkimdi istermen tanysyp shyqqanyn aityp, Shymkent qalasyn aralaý kezinde onyń qarqyndy damyp kele jatqanyna kóz jetkizgenin aitty.
«Biyl Dúniejúzilik bank pen Qazaqstannyń áriptes atanǵanyna 25 jyl tolyp otyr. Osy datany atap ótip, qarjylandyrý baǵdarlamasynyń kezekti bes jyldyǵyn qorytyndylaimyz. Aldaǵy ýaqytta qarjylandyrýdyń jańa baǵdarlamasyn bastaýdy josparlap otyrmyz», - dep qosty Ato Braýn.
Kezdesý sońynda oblys ákimi Janseiit Túimebaev Dúniejúzilik banktiń Qazaqstandaǵy turaqty ókili A.Braýnǵa sáttilik pen tabys tiledi.
