Shymkent qalasynan otbasymen birge Soltústik Qazaqstan oblysyna kóship bara jatqan Aishagúl Kúzetbaeva. Shymkent, 30 sáýir 2017 jyl.
Ońtústik Qazaqstan oblysynyń Sairam, Qazyǵurt, Saryaǵash, Maqtaral aýdandary jáne Shymkent qalasynan jiyny 37 otbasydan turatyn kósh sáýirdiń 30-y kúni Soltústik Qazaqstan oblysyna attandy. Olar Shymkent qalasy men Saryaǵash aýdanynan eki avtobýspen jolǵa shyqty.
Shymkent qalasynyń turǵyny Aishagúl Kúzetbaeva tórt balasymen birge Soltústik Qazaqstan oblysy Maǵjan Jumabaev aýdanyna qonys aýdaryp barady.
- Bir apta buryn kóshetin jerimizdi kórip keldik. Kúieýim qazir sol jaqta, ol kólik júrgizýshisi, ózim tiginshimin. Jańa qonysta mal sharýashylyǵymen ainalyssaq deimiz, - deidi ol.
Ońtústik Qazaqstan oblystyq jumyspen qamtýdy úilestirý jáne áleýmettik baǵdarlamalar basqarmasynyń bólim bastyǵy Nurjan Nurashov ózge oblysqa kóship barǵan otbasylaryna memleket esebinen bir jolǵy járdem beriletinin aitady.
- Biyl qonys aýdarǵan otbasynyń ár múshesine 35 ailyq eseptik kórsetkish mólsherinde, iaǵni 79 myń teńge bir rettik kómek beriledi. Bir jylǵa deiin turatyn úidiń jaldaý aqysy men kommýnaldyq tólemderi óteledi, - deidi ol.
Sheneýniktiń sózinshe, bir rettik kómek alǵan árbir azamat kóship barǵan jerinde 6 aiǵa deiin turýǵa mindetti. «Eger jarty jylǵan jetpei ol jaqtan qaityp keletin bolsa, memleketten alǵan kómekti keri qaitarady» deidi ol. Nurjan Nurashov biyl Ońtústik Qazaqstan oblysynan 680 otbasy basqa aimaqtarǵa kóship barýǵa niet bildirgen.
Ońtústik Qazaqstan oblystyq jumyspen qamtýdy úilestirý jáne áleýmettik baǵdarlamalar basqarmasynyń málimeti boiynsha, ótken jyly oblystan 146 otbasy nemese 572 adam Qazaqstannyń ózge óńirlerine qonys aýdarǵan. Onyń ishinde 125 otbasy Soltústik Qazaqstan oblysyna, qalǵandary Qostanai jáne Shyǵys Qazaqstan oblystaryna kóship barǵan.
