Nur-Sultan qalasynyń politsiia departamenti "ÓKM operatory" JShS (Operator ROP) basshylarynyń biri Rýslan Shámshievtiń ólimine qatysty tergeý júrgizip jatyr.
Esil aýdanynyń politsiia bólimi Qylmystyq kodekstiń 105-baby (Óz-ózine qol jumsaýǵa jetkizý) boiynsha tergeýdi bastady. Qazirgi kúni tiisti saraptamalar taǵaiyndaldy.
Aldyn ala boljam boiynsha ol ózine qol jumsaǵan.
Shámshiev 2021 jyldan kompaniianyń quqyqtyq máseleleri jónindegi basqarýshy direktory bolǵan. Sondai-aq, "Azamattarǵa arnalǵan úkimet", kóliktik prokýratýra jáne keden organdarynda qyzmet etken.
Buǵan deiin sybailas jemqorlyqqa qarsy is-qimyl agenttigi ekologiia vitse-ministri Ahmetjan Pirimqulov pen "ÓKM operatory" JShS basqarma tóraǵasy Medet Qumarǵalievti ustaǵanyn jazǵan bolatynbyz.
Olar jemqorlyqqa qatysty kúdikke ilindi. BAQ málimetinshe, Pirimqulov pen Qumarǵaliev elden ketýge oqtalǵan.
Eske sala keteiik, 2022 jylǵy 11 qańtarda QR Parlamenti Májilisiniń otyrysynda sóilegen sózinde Memleket basshysy Qasym-Jomart Toqaev «ÓKM Operatory» JShS-niń kádege jaratý alymyn júrgizý jáne kádege jaratý alymyna ielik etýin toqtatý týraly tapsyrma berdi.
Sonyń aiasynda 2022 jylǵy 18 qańtarda QR Úkimeti «QR Ekologiia, geologiia jáne tabiǵi resýrstar ministrligine vedomstvolyq baǵynysty uiymdardyń keibir máseleleri týraly» qaýly qabyldady. Osyǵan bailanysty óndirýshilerdiń (importtaýshylardyń) keńeitilgen mindettemeleriniń operatory bolyp memlekettik uiym retinde «Jasyl damý» aktsionerlik qoǵamy aiqyndaldy.
Aita keteiik, Qylmystyq kodekstiń 105-babynda jábirlenýshini qorqytý, oǵan qatygezdikpen qaraý nemese onyń adami qadir-qasietin únemi qorlaý arqyly adamdy ózin-ózi óltirýge deiin nemese ózin-ózi óltirýge barýǵa deiin jetkizý úsh jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrýǵa jazalanatyndyǵy kózdelgen.
