Astanada Halyqaralyq «Qazaq tili» qoǵamynyń uiymdastyrýymen Disney&Pixar stýdiialarynyń «Oiynshyqtar hikaiasy 5» animatsiialyq filminiń qazaq tilindegi jabyq kórsetilimi ótti, dep habarlaidy ult.kz.
Arnaiy kórsetilimge elimizge tanymal tulǵalar, qoǵam qairatkerleri, kásipkerler men depýtattar, dýbliaj akterlary men blogerler, BAQ ókilderi qatysty.
Is-sharanyń maqsaty – qazaq tilindegi sapaly mazmundy qoldaý, qazaqsha dýbliajdyń mańyzyn nasihattaý jáne qazaq tilindegi kontenttiń damýyna úles qosyp júrgen til janashyrlaryn bir alańǵa jinaý.
Filmderdi túrli elderdiń aýditoriiasyna beiimdep, jergilikti tilderge dýbliajdaý Disney kompaniiasynda burynnan qalyptasqan tájiribe. Kompaniia jyl saiyn óz filmderiniń 40-tan astam tildegi nusqasyn ázirleidi. Sońǵy úsh jylda Disney stýdiiasy «Oijumbaq 2», «Moana 2», «Mýfasa. Arystan patsha», «Aqshaqar», «Lilo men Stich», «Ańdar shahary 2» jáne basqa da týyndylardy qosa alǵanda, 10-nan astam filmdi qazaq tiline aýdaryp, dýbliaj jumysyn qarjylandyrdy.
«Oiynshyqtar hikaiasy 5» filmindegi keiipkerlerdi qazaq tilinde sóiletkender: Ábilmansur Serikov – Sozalaq, pitstsa, Bota Miia – Dolli, Asan Májit – Tikenek myrza, Zarina Kármen – Triksi, Bonnidiń mamasy, Shah-Murat Ordabaev – Reks, qazaq tilindegi dýbliaj rejisseri – Shah-Murat Ordabaev.
Halyqaralyq «Qazaq tili» qoǵamynyń prezidenti Raýan Kenjehanuly qazaq tilindegi mazmunǵa degen suranystyń júieli túrde artyp kele jatqanyn atap ótti.
«Búgin biz qazaqsha dýbliajdy qoldap júrgen til janashyrlaryn arnaiy jinadyq. Mundai kórsetilimderdiń maqsaty – qazaq tilindegi sapaly mazmunǵa degen qoldaýdy kúsheitý jáne kórermen nazaryn aýdarý. Sońǵy jyldary qazaq tilindegi filmderge degen qyzyǵýshylyqtyń aitarlyqtai artqanyn baiqap otyrmyz. Kinoteatrlarǵa qazaqsha seanstarǵa keletin kórermen kóbeidi, ata-analar balalaryn qazaq tilindegi filmderge jii alyp kele bastady. Bul – qazaq tilindegi kontent naryǵynyń qalyptasqanyn kórsetetin mańyzdy ózgeris. Álemdik stýdiialardyń qazaq tilindegi dýbliajǵa turaqty túrde investitsiia salýy da osy suranystyń nátijesi dep oilaimyn. Sondyqtan qazaq tilindegi filmderdi qoldaýǵa shaqyramyz», – dedi Raýan Kenjehanuly.
18 maýsymnan bastap «Oiynshyqtar hikaiasy 5» animatsiialyq filmi kinoteatrlarda qazaq tilinde kórsetiledi.
