Ońtústik Qazaqstan oblysynyń ortalyǵy Shymkentte qala kúni merekesin atap ótý bastalyp ketti, dep habarlaidy aimaq basshysynyń baspasóz qyzmeti.
Is-shara aldymen oqýshylardyń sherýimen bastaldy. Ál Farabi alańynda ótken erekshe sherýdi Ońtústik Qazaqstan oblysynyń ákimi J.Túimebaev, Shymkent qalasynyń ákimi Ǵ.Ábdiraxymov jáne el aǵalary men shahar turǵyndary tamashalady. Alańǵa jinaǵan óner mektebiniń shákirtteri, mýzyka jáne horeografiia ujymdary men jas sportshylar merekelik sherýmen júrip ótti. 1500-den astam oqýshy qatysyp, sap túzegen is-sharany qala jáne óńirimizdiń turǵyndary tamashalady. Aita ketý kerek, merekelik ár sherý ár taqyrypqa arnaldy.
Budan keiingi is-shara atshabarda ótti. Munda alaman báigesi uiymdastyryldy. Oblystyq ulttyq sport túrleri mektebiniń muryndyq bolýymen ótken báigege osy mekteptiń óńirimizdiń aýdan-qalalarynan kelgen jas shákirtteri qatysty. 16 shaqyrymǵa sozylǵan báige jeńimpazdaryn oblys ákimi Janseiin Túimebaev marapattap, júldelerin tabys etti. Aita keteiik, alaman báigeniń jeńimpazy atanǵan shabandoz Smail Jeńiske bas júldege tigilgen "Niva" avtokóligi tartý etilse, ekinshi oryn alǵan Jasulan Turǵanbaevqa – 450 myń teńge, al úshinshi oryn iegeri Alik Nurmahanbetovqa 300 myń teńge aqshalai júldeniń sertifikaty tabys etildi.
Taǵy bir aita qalarlyqtai is-shara Naýryz alańynda ótti. Munda baýyrsaq pisirýden absoliýttik rekord ornatyldy. Qala kúnin atap ótý barysynda Qazaqstannyń «KInES» rekordtar kitabynyń (Ginnestiń rekordttar kitabynyń qazaqstandyq nusqasy) jańa rekordy tirkeldi. «Altyn dán» kompaniiasynyń qoldaýymen jergilikti úzdik 20 aspaz 1139 keli baýyrsaq pisirdi. Jańa rekord ornatylyp, arnaiy komissiiada tirkelgeni jaily sertifikat rekord ornatýshylarǵa tabystaldy. Aita keteiik, buǵan deiingi rekord Almatyda tirkelip, onda 856 keli baýyrsaq pisirilgen edi. Al óńirimizdegi rekordty ornatý úshin 750 keli un, 400 litr mai, 60 keli qant pen 150 litr sút jumsaldy. Bir tonnadan astam baýyrsaq 10 qazanda pisirildi. Al, onyń salmaǵy arnaiy tarazyda ólshendi. Rekord tirkelgen soń baýyrsaq arnaiy qaǵaz qaltalarǵa salynyp, qonaqtarǵa taratyldy. Aita keteiik, qala kúni merekesine 30 myńnan astam adam qatysýda. Mereke keshkilik gala-kontsertpen jalǵasatyn bolady.
