Ońtústik Qazaqstan oblysy «EKSPO-2017» halyqaralyq mamandandyrylǵan kórmesine kelýshi qonaqtardy kútip alýǵa daiyn. Ońtústik Qazaqstan oblysyna kelýshi týristerge oblys ákimdigi men týristik assotsiatsiia birlese arnaiy 3-5 kúndik týristik marshrýttar ázirledi.
Mundaǵy 3 kúndik marshrýttyń baǵasy 10-15 adamdyq topqa 62 400 teńge bolsa, 5 kúndik marshrýttyń baǵasy 10-15 adamǵa 106 myń teńgeni qurap otyr.
Olar tarihi jáne sáýlet eskertkishterin tamashalaýǵa arnalǵan týristik nysandar. Máselen, týrister Túrkistan qalasynda «Áziret Sultan» qoryq-murajaiy men Saýran qalashyǵyna, Otyrar aýdanynda Arystan bab kesenesi men Otyrar qalashyǵy, Báidibek aýdany boiynsha Aqmeshit úńgiri jáne Domalaq ana kesenesine, al Qazyǵurt aýdanynda «Keme qalǵan» memorialdy keshenine, «Adam ata – Jer ana» tabiǵi eskertkishin tamashalasa, Tólebi aýdanynda «Sairam-Ógem» memlekettik ulttyq tabiǵi parki men Túlkibas aýdanynda «Aqsý - Jabaǵyly» memlekettik tabiǵi qoryǵyna baryp tanysa alady. Sonymen qatar, Shymkent qalasy boiynsha tanymdyq ekskýrsiia (Dendrosaiabaq, Táýelsizdik saiabaǵy, Naýryz alańy, Báidibek bi eskertkishi jáne t.b.) uiymdastyrlady.
Munan bólek, oblysta eki etno-aýyl boi kótergen. Bul qonysta qonaqtarǵa halqymyzdyń turmys-salty keńinen nasihattalady. Munda at basyn burǵandar qazaqtyń ulttyq taǵamdarynan dám tatyp qana qoimai, ony óz qolymen ázirleýine de jaǵdai jasalǵan.
