Búgin oblystyq «Qazaqstan halqy Assambleiasy» ǵimaratynda «Amangeldi» JShS-niń direktory Nurlan Quralov, «Altyn Adam» tigin fabrikasynyń direktory Baljan Qalmuratova, «Bella Mebel» jihaz fabrikasynyń brend-menedjeri Ýmida Nazirova bolashaq kásipkerler úshin sheberlik sabaǵyn ótkizdi, dep habarlaidy "Ult aqparat".
Oblystyq «Qoǵamdyq kelisim» KMM basshysy Erbol Baiqonaqov ashyp, júrgizgen jiynǵa aýdan-qalalarynan kásipkerlikpen ainalysýǵa nietti azamattar men kásiptik mamandyqty igerip jatqan stýdent jastar qatysty.
Erkin farmatta ótken basqosýda kásipkerler óz tájiribelerimen bólisip, tabysqa jetýdiń joldary jaily ashyq áńgime órbitti. Aýyl sharýashylyǵymen ainalysýǵa qolaily aimaqta ornalasqanymyzdy aitqan "Amangeldi" JShS-nyń direktory Nurlan Quralov bul salanyń bolashaǵy zor ekendigine naqty mysaldar keltirdi. Al, «Altyn Adam» otandyq kiimder brendiniń negizin qalaýshy Baljan Qalmuratova jastardy búginnen kásipkerlikke beiimdelýge shaqyryp, bul baǵytta tájiribe almasýǵa árqashan daiyn ekenin aitty. Eýropalyq sapada ónim shyǵaratyn «Bella Mebel» jihaz zaýyty jaqynda «Biznestiń jol kartasy – 2020» baǵdarlamasy aiasynda Sairam aýdanynda ashylǵan. Jylyna 4 myń jiyntyq jihaz shyǵarýǵa qaýqarly fabrikanyń ókili kásipkerlerge memleket tarapyna kórsetilip jatqan qoldaýlarǵa keńinen toqtaldy.
Aita ketý kerek, oblystyq assambleia óńirdegi etnomádeni birlestiktermen birge tek kópshilik mádeni is-sharalar ótkizýmen shektelmei, týǵan jerdiń ekonomikasyn damytýǵa da úles qosyp keledi.
Óńirdiń áleýmettik-ekonomikalyq damýyna etnomádeni birlestikter tarapynan laiyqty úles qosý, belgili bir kásipke mamandanǵan QHA músheleriniń úzdik is-tájiribelerin ózgelerge úiretý arqyly turǵyndar arasynda kásipkerliktiń óris alýyna jaǵdai jasaý baǵytynda jyl basynan beri birqatar is-sharalar uiymdastyryldy. Atap aitsaq, oblystyq ózbek, tájik, túrik etnomádeni birlestikteriniń uiymdastyrýymen shaǵyn nesie uiymdary jetekshilerimen kezdesýler, Sairam, Maqtaral, Saryaǵash aýdandaryndaǵy jylyjailar men mal bordaqylaý alańdarynda praktikalyq seminarlar ótti. Oǵan 300-den astam adam qatysyp, óz isin bastaýǵa baǵyt-baǵdar aldy.
