Oblys ákimderi janama sailaý arqyly taǵaiyndalady. Bul týraly QR Prezidenti Qasym-Jomart Toqaev Qazaqstan halqyna Joldaýynda aitty, dep habarlaidy QazAqparat.
«Sondai-aq máslihattardyń yqpalyn barynsha kúsheitý úshin oblys ákimderin taǵaiyndaý tártibin ózgertý qajet dep sanaimyn. Qazir máslihat depýtattary Memleket basshysy usynatyn bir ǵana kandidatýraǵa kelisim beredi nemese kelisim bermeidi», - dedi Memleket basshysy.
Osyǵan orai Qasym-Jomart Toqaev Prezidentke oblystardyń, respýblikalyq mańyzy bar qalalardyń ákimi laýazymyna balama negizde keminde eki kandidat usyný quqyǵyn reglamentteitin zańnamaǵa ózgertýler engizý qajettigin aitty.
«Osylaisha, Prezident máslihattardyń qaraý nátijesin eskere otyryp, oblystardyń jáne respýblikalyq mańyzy bar qalalardyń ákimderin taǵaiyndaityn bolady. Túptep kelgende óńirlerdiń basshylaryn janama sailaý týraly sóz bolyp otyr. Sonymen qatar Memleket basshysynda óńir basshylaryn máslihatpen keńespei jumystan bosatý quqyǵy saqtalady», - dedi Qasym-Jomart Toqaev.
