1 aqpan kúni QR Mádeniet jáne sport ministrligi tapsyrysy boiynsha «Asau Art Films» qatysýymen Sh.Aimanov atyndaǵy «Qazaqfilm» AQ túsirgen «Oazis» filmi prokatqa shyǵady, dep habarlaidy "Ult aqparat".
«Qazaqfilm» AQ baspasóz qyzmeti habarlaǵandai, filmde kózdegen maqsattaryna jetý jolynda ár qaisysynyń óz amaldary bar, ómirge degen kózqarastary bir-birine uqsamaityn, minezderi de múldem bólek eki jigittiń taǵdyry baiandalady.
- Búgingi qazaq qoǵamy rýhani turǵydan - tildik, dindik turǵydan ekige bólinip jatyr. Qazaq qazaqty túsinbei jatyr, bul ultymyzdyń tragediiasy. Osynyń jemisin jas urpaq jinap jatyr. Bul tragediiany biz «Oazis» filmindegi keiipkerleri arqyly - dalada kezdesken eki qazaqtyń qaqtyǵysy arqyly kórsetýge tyrystyq. Biri – dini de, tili de, tarihy da buzylmaǵan, oralman jigit bolsa, ekinshisi – Almatydaǵy balalar úiinde tárbielengen, dini de joq, tili de joq, tarihi jady da joq Rýslan esimdi shala qazaq. Jalpy, «Oazis» – din taqyrybyn qozǵap, imany buzylǵan qazaq qoǵamy úshin imannyń qanshalyqty mańyzdy ekenin kino tilimen aitýǵa umtylǵan film, – dedi filmniń stsenarii avtory, belgili jazýshy Smaǵul Elýbai.
«Oazis» filminiń negizgi túsirý jumystary Almaty oblysy Shonja aýylynda, sonymen qatar Almaty qalasynda júrgizildi. Filmdegi basty róldi T.Júrgenov atyndaǵy Qazaq Ulttyq óner institýtynyń túlegi Aidar Asarbai somdady.
Aita ketsek, «Oazis» filmi rejisser Begars Elýbaidyń alǵashqy jeke jumysy. Onyń aldynda ol rejisser Erlan Nurmuhambetovpen birge balalarǵa arnalǵan «Ańshy bala» filmin (2012 jyly jaryqqa shyqqan) túsirgen bolatyn. Atalǵan týyndy kóptegen halyqaralyq kinofestivalderde júldeli oryndarǵa ie boldy. Mysaly, Gollivýdta ótken halyqaralyq kinofestivalde «Sheteldiń úzdik filmi», 2012 jyly ótken «Kinoshok» festivali sheńberinde «Kinomalyshok» baiqaýynda «Úzdik film» júldelerin imedendi. Sondai-aq, Irkýtskide ótken «Baikal júregi» halyqaralyq kinosfestivalinde «Balalarǵa arnalǵan úzdik film» júldesimen marapattalǵan bolatyn. Búginde rejisser «Bala ǵashyq» atty kelesi filmdi túsirip jatyr.
«Oazis»
Filmde ómirge degen kózqarastary bir-birine uqsamaityn, minezderi de múldem bólek eki jigittiń taǵdyry baiandalady. Rýslan - ananyń meiirimin kórmegen tastandy bala. Politsiia qyzmetkerlerinen qashyp júrgen ol ózimen birge búkil álemdi joiyp jibermek oiy bolady. Alaida shóldi dalada ol júreginde imany bar, tóńiregindegilerdi mahabbat pen meiirimdilik nuryna bólendirip júrgen jigitti kezdestiredi.
Óndirisi: Sh.Aimanov atyndaǵy "Qazaqfilm" AQ, «Asau Art Films» JShS qatysýymen
Janry: psihologiialyq drama
Uzaqtyǵy: 88 minýt
Qoiýshy rejisseri: Begars Elýbaev
Stsenarii avtory: Smaǵul Elýbaev, Begars Elýbaev
Qoiýshy operatory: Aleksandr Rýbanov
Qoiýshy sýretshi: Djalalitdin Ibragimov
Kompozitory: Ádilhan Baiysbaev
Rólderde:Aidar Asarbai, Ádilet Topaev, Saǵat Jylgeldiev jáne basqalar.
Rejisser týraly anyqtama:
Begars Elýbai 1974 jyly 10 jeltoqsanda dúniege keldi. 1991 jyly Ál Faarabi atyndaǵy Qazaq Ulttyq Ýniversitetiniń filalogiia fakýltetine oqýǵa túsken. 1998-2002 jyldar aralyǵynda Máskeýdegi kásipkerler men quqyq institýynda dáris alǵan.
Filmografiiasy: «Ańshy bala» (2012 j., teń rejisseri), «Oazis» (2018 j.).
