Qaraǵandylyq Farida Ǵabbasova alǵash ret 2011 jyly AQSh-qa arman qýyp baryp, kúni búginge deiin sonda turyp jatyr. Shet tilin tereń meńgerý maqsatynda muhit asyp barǵan jerlesimiz qazirgi kúni AQSh-ta óz kásibin dóńgeletip otyr. Milliondaǵan adamdardyń bir kórý armanyna ainalǵan álemdik megopolis Niý-Iorkte óz isin ashqan otandasymyz QazAqparat tilshisimen tildesken bolatyn.
«Men Qaraǵandy qalasynyń týmasymyn. Sonda týyp-ósip, aǵylshyn tili mamandyǵyn igergen soń, til meńgerýdi jetildirý maqsatynda 2011 jyly Niý-Iorkke (AQSh) keldim. Qala maǵan birden unady, sodan qalamyn dep sheshtim. AQSh-taǵy oqýymdy bitirip, Qazaqstanǵa kelgen soń, kóp uzamai Amerikaǵa arman qýalap qaita keldim. Ol kezde men munda eshkimdi bilmedim, eshqandai tanys-týysym bolmady. Kele sala jumys izdeýge kiristim. Osynda syrttan kelgenderdiń kóbisi «eń bastysy jumysqa tursam boldy, kim bolyp istegenim mańyzdy emes» deidi. Iaǵni bala kútýshi, úi qyzmetshisi, ydys jýýshy jáne taǵy basqa jumystar. Men ózime birden keńsede jumys isteitin bolamyn dep maqsat qoidym, kóp uzamai jyljymaityn múlik kompaniiasyna hatshy bolyp jumysqa ornalastym», - dedi Farida Ǵabbasova.
Sondai-aq, jerlesimiz Niý-Iorkte kezdestirgen jigitine turmysqa shyqqan.
«Joldasym italiialyq. Tanystyqtan keiin kóp uzamai jarty jyldyń ishinde otaý qurdyq. Jumys istep júrip, bala kúngi armanymdy oryndaý maqsatynda sán jáne dizain ýniversitetine oqýǵa tústim. Osy salany tereńirek taný úshin, sán úii direktorynyń kómekshisi (assistent) bolyp jumysqa turdym. Sol kezden bastap kúni búginge deiin sol jerde jumys isteimin. Qazirgi kúni búkilálemdik tanymal jeli «Orient Craft LTD» kompaniiasynyń AQSh-taǵy ókildiginiń jetekshisimin. Biz H&M, ZARA jáne taǵy basqa tanymal brend kiimderdiń dizainyn jasaimyz. Kompaniiada jumys istep júrip, maǵan óz meiramhanamdy ashý ideiasy keldi. 2015 jyly Manhettennen ǵimarat satyp alyp, óz meirahanamdy ashtym, bul iske inimde kómektesti. Basynda biz tek amerikalyq as mázirin usynýdy jón sanadyq, ol úshin arnaiy bas aspaz jaldadyq, bizdiń jaldaǵan bas aspaz kezinde belgili akter Robert De Niroǵa jumys istegen bolyp shyqty. Degenmen ýaqyt óte kele ol oidan bas tarttyq. Sebebi amerikalyqtardy óz ashanasymen tań qaldyra almaisyń, onyń ústine munda básekelestik joǵary», - deidi ol.
Ýaqyt óte kele otandasymyz meiramhanaǵa kelgen meimandarǵa palaý, mánti, samsa taǵamdaryn usyna bastaǵan.
«Bir qyzyǵy amerikalyq as mázirinen góri, bizdiń ortaaziialyq taǵamdarǵa degen suranys arta bastady. Sony baiqaǵan biz, meiramhanany ýaqytsha jóndeýge jaýyp, 2018 jyly taza shyǵys ashanasy etip, ataýyn «Farida» Central Asian Cuisine and Grill dep ózgertip qaita ashtyq. Shyǵys ashanasyna kóshken soń, biz shyǵys taǵamdaryn ázirlei alatyn aspazdardy izdedik, qazirgi kúni bizdiń aspazdardyń barlyǵy Ortalyq Aziia elderiniń ókilderi. As mázirine kelsek, árine etten bastap, baýyrsaq, sútti shái bári bar. Ulttyq taǵamymyzdy qolǵa alǵan sátten bastap, bizge kelýshilerdiń de sany arta bastady. Búginde bizdiń meiramhanadan jurttar kezekke turyp túski nemese keshki as ishedi», - dedi F. Ǵabbasova.
Onyń aitýynsha, qazaqtyń ulttyq taǵamdarynyń dámin tatqan sheteldikter Qazaqstanǵa qyzyǵýshylyq tanytyp, týrist retinde barǵysy keledi eken.
«Qazaqstanǵa baryp kelgen amerikalyqtar «elderińizde boldyq, taǵamdary óte dámdi» dep yqylasyn bildirip, bizden tamaqtanyp turady. Al elimizde bolyp kórmegen biraq bizdiń ulttyq taǵamnyń dámin tatyp kórgen amerikalyqtar Qazaqstandy kórýdi armandaidy. Odan bólek, ataqty jerlesterimiz Gennadii Golovkin men Dimash Qudaibergenniń jankúierleri bizge kelip tamaqtanady. Dimashtyń Niý-Iorktegi kontsertinen soń qyzyq oqiǵa boldy. Onyń osyndaǵy jankúierleri bizdiń meiramhanaǵa arnaiy kelip, Dimashtyń jáne jalpy qazaq halqynyń qandai taǵam jeitinin surap, ózderi de sol asqa tapsyrys berdi. Tipti olar úshin teledidardan arnaiy Dimashtyń kontsertin qosyp qoidyq», - deidi AQSh-taǵy jerlesimiz.
Jerlesimizdiń sózine sensek, qazaqtyń ulttyq taǵamyn usynatyn Manhetten (Niý-Iork) tórindegi meiramhana qaladaǵy úzdik TOP-20 meiramhana qataryna kiredi.
«Jýyrda úlken tapsyrys aldyq. Naqty aitqanda, osy aqpan aiynda Los-Andjelesten amerikalyq stýdentter toby keledi. Belgili bolǵandai, stýdentter Ortalyq Aziia halyqtarynyń tól mádenietin zertteýde. Onyń ishinde Qazaqstanda bar. Stýdentter bizdiń meiramhana týraly bilip, qazaqtyń ulttyq mádenietimen qatar, ashanasymen tanysý maqsatynda kele jatyr», - deidi ol.
Sonymen qatar, F. Ǵabbasova ózge elde óz isin ashqysy keletin jandar úshin keńesin aityp, bolashaqqa josparymen bólisti.
«Bizdiń alǵa qoiǵan maqsat-josparymyz kóp, atap aitsaq jýyrda Niý-Iorkte ekinshi meiramhana ashqaly jatyrmyz. Sebebi bizdiń turaqty tutynýshylarymyzdyń sany kún sanap artýda, sondyqtan ekinshi oryndy ashqymyz keledi. Odan bólek, AQSh boiynsha franshiza ashýdy josparlap otyrmyz, bizdiń maqsat – el naryǵyn túgel qamtý. Al shet elde óz kásibin dóńgeletkisi keletin azamattarǵa aitarym, siz usynatyn ónim nemese taýar erekshe bolýy qajet. Sebebi siz qazir naryqta bar dúnieni usynsańyz, oǵan eshkim qyzyqpaidy. Sonymen qatar, erekshe isińizdiń úzdigi bolýyńyz kerek», - dep atap ótti ol.
