Búgin Májilis spikeri Nurlan Nyǵmatýlinniń tóraǵalymen jalpy otyrys ótti. Onda depýtattardyń bastamasymen ázirlengen qaryzdyq eńbekti retteýge qatysty zań jobasy birinshi oqylymda maquldandy, dep habarlaidy "Ult aqparat" tómengi palatynyń baspasóz qyzmetine silteme jasap.
Qujat qaryzdyq eńbek salasynda eńbek etýshi azamattardy áleýmettik qorǵaýǵa, sondai-aq jumys berýshiler tarapynan olardyń eńbek úshin syiaqy alý quqyǵy saqtalýyn, eńbek jaǵdailaryn qaýipsizdik jáne gigiena talaptaryna sáikes qamtamasyz etýge baǵyttalǵan.
Zań jobasyn talqylaý barysynda Májilis Tóraǵasy Nurlan Nyǵmatýlin: «Qai kezeńde de eńbek máselesi óte mańyzdy. Sondyqtan bul salany árqashanda zań deńgeiinde qorǵaý úshin der kezinde naqty qadamdar jasalyp keledi. Sonyń biri búgingi biz maquldaǵan zań jobasy. Osy qujatta qaryzdyq eńbekti retteý degen normalar engizildi. Bul azamattardy jumyspen qamtý jáne olardyń áleýmettik jaǵdaiyn saqtaý jolynda taǵy bir jańa múmkindik deýge bolady», - dep atap ótti.
Sonymen qatar osy Eńbek kodeksinde qabyldaýshy jáne jiberýshi taraptar jumyskeriniń quqyqtary men mindetteri eskerilgen. Máselen, qabyldaýshy tarap jumyskerleriniń negizgi jalaqysynan tómen emes jalaqy mólsherin retteitin normalarmen tolyqtyrý usynylǵan. Sondai-aq, qaryzdyq jumyskerdiń eńbek qyzmeti ýaqytyndaǵy jazataiym oqiǵalar kezindegi tergep-tekserý tártibin jáne personaldy berý jónindegi qyzmetterdi kórsetý boiynsha qyzmetti júzege asyrý tártibin retteitin normalar qarastyrylǵan.
