Búgin Májilis spikeri Nurlan Nyǵmatýlinniń tóraǵalyǵymen ótken jalpy otyrysta depýtattar EAEO sheńberinde aýyl sharýashylyǵy janýarlarymen selektsiialyq-asyl tuqymdyq jumys júrgizýdi birizdendirýge baǵyttalǵan sharalar týraly kelisimdi ratifikatsiialaý týraly zań jobasyn maquldady, dep habarlaidy "Ult aqparat" tómengi palatanyń baspasóz qyzmetine silteme jasap.
Otyrys barysynda depýtattar EAEO aiasynda asyl tuqymdy mal sharýashylyǵynyń ortaq naryǵyn damytý jáne bar kedergilerdi joiý maqsatynda Kelisimde selektsiialyq-asyl tuqymdyq jumys salasyndaǵy birqatar is-sharalardy, onyń ishinde asyl tuqymdy ónimge molekýliarlyq genetikalyq saraptama júrgizýdi birizdendirý kózdelgenin atap ótti.
Sonymen qatar, depýtattar jalpy otyrysta genetikalyq saraptama júrgizý úshin respýblikada tiisti materialdyq-tehnikalyq baza, sondai-aq elimiz asyl tuqymdy maldardy EAEO-tyń qandai elderimen, qandai kólemde aiyrbastap kelgeni týraly máselelerdi qozǵady.
Nurlan Nyǵmatýlin osy zań jobasyn talqylaý kezinde depýtattar tarapynan Resei Federatsiiasynan asyl tuqymdy maldardy ákelý úshin birqatar kedergiler oryn alatyny týraly pikirler aitylǵanyn, al osy ratifikatsiiany qabyldap, oǵan Memleket basshysy qol qoiǵannan keiin ol TMD elderinen asyl tuqymdy maldardy kedergisiz alyp kelýge jol ashatyn atap ótti.
Palata Tóraǵasynyń aitýynsha, osy máseleni Májilis zań jaǵynan qamtamasyz etip otyr, al jaýapty ministrlik basqa memlekettik organdarmen birlesip, uiymdastyrý sharalaryn jasaýy qajet.
Nurlan Nyǵmatýlinniń pikirinshe, bul aýyl sharýashylyǵy salasynda jumys isteitin kásipkerlerge kómek bolady.
