Nur-Sultan qalasynda «Elbasy N.Á.Nazarbaevtyń Qazaqstandaǵy parlamentarizmniń qalyptasýy men damýyndaǵy róli» atty halyqaralyq konferentsiiasy ótýde, dep habarlaidy "Ult aqparat".
Dástúrli forýmdy ashqan Májilis Tóraǵasy Nurlan Nyǵmatýlin QR Tuńǵysh Prezidenti Nursultan Nazarbaevtyń táýelsiz Qazaqstannyń jáne onyń parlamentarizmin qalyptastyrý jolyndaǵy teńdessiz róline toqtaldy.
Májilis Tóraǵasy atap ótkendei, Elbasymyz elimizdi barlyq qiyndyqtan aman alyp shyǵyp, iri saiasi, ekonomikalyq áleýmettik reformalar jasady. Memleketimizdi álemdik deńgeige jetkizdi. «Qazaqstandyq damý joly» qalyptasty. Sondyqtan, shyn máninde, «Táýelsizdik joly ol – Elbasy joly». Osy damý jolymyz qazir Prezident Qasym-Jomart Toqaevtyń basshylyǵymen odan ári jalǵasýda.
Osy úlken jolda táýelsizdik tarihymen birge kele jatqan qos palataly Parlamenttiń de úlesi zor ekenin basa aitqan Nurlan Nyǵmatýlin:
«Búginde bizdiń kásibi Parlament qoǵamdyq pikirler men ashyq saiasattyń biik orny bolýmen qatar, múmkindigi mol, qýaty myqty, joǵary zań shyǵarýshy organǵa ainaldy. Ózine júktelgen, árbir mindetti abyroimen atqaryp, Elbasy Nursultan Ábishuly Nazarbaevtyń jáne Memleket Basshysy Qasym-Jomart Toqaevtyń mańyzdy qadamdaryn, saiasi, ekonomikalyq, áleýmettik bastamalaryn sapaly zańdarmen qamtamasyz etip keledi», -dedi.
Sonymen qatar palata Spikeri Qazaqstan Parlamentiniń órkenietti elderdiń zańnamalyq organdarymen teń dárejede qyzmet etip, Elbasymyz aitqandai, naǵyz demokratiia mektebine ainalǵanyn jetkizdi.
Nurlan Nyǵmatýlinniń pikirinshe, osynyń barlyǵy Tuńǵysh Prezident N.Nazarbaevtyń el basqarýdaǵy dana, kóregen, syndarly saiasatynyń jemisi.
Májilis Tóraǵasy búgingi tańda búkil álemdi qamtyǵan kúrdeli ahýalǵa nazar aýdaryp, osyndai qiyn jaǵdaida bizdiń elimizde áleýmettik-ekonomikalyq turaqtylyqty saqtaýǵa, jumyspen qamtýǵa jáne halyqtyń tabys deńgeiin qamtamasyz etýge zor kóńil bólindi.
«Daǵdarysqa qarsy jedel sharalar sheńberinde kiristerin ýaqytsha joǵaltqan 4,5 millionnan astam qazaqstandyq ai saiynǵy óteýsiz memlekettik kómek aldy. Bul maqsatqa 450 milliardtan astam teńge jumsaldy. Osy kúrdeli kezeńde bizdiń Tuńǵysh Prezidentimiz burynǵydai barsha qazaqstandyqtar birliginiń kepiline ainalǵanyn erekshe atap ótkim keledi», - dedi.
Elbasynyń bastamasymen «Birgemiz» ulttyq qaiyrymdyq qory uiymdastyrylyp, jalpyhalyqtyq qozǵalys barlyq qazaqstandyqtardy bir maqsatqa jumyldyrdy. Sonymen qatar, qordyń birjolǵy qaiyrymdylyq qarjylai qoldaýyna 550 myńnan astam qazaqstandyq otbasy ie boldy. Millionnan astam adam azyq-túlik jáne turmystyq kómekpen qamtylyp, myńdaǵan erikti muqtaj jandarǵa járdemdesti.
Óz kezeginde koronavirýstyń taralýyna qarsy turý jáne tótenshe jaǵdai kezinde turaqtylyqty qamtamasyz etý jolynda Elbasynyń bastamasyna Májilis depýtattarynyń biraýyzdan qoldaý bilgirgenin aitqan Palata Spikeri Nurlan Nyǵmatýlin:
«Búginde Memleket Basshysy Qasym-Jomart Toqaevtyń ekonomikalyq ósimdi qalpyna keltirý jónindegi bastamasy zańnamalyq qoldaýǵa ie bolyp otyr. Ózderińizge belgili, aǵymdaǵy jyldyń naýryz aiynan beri Parlament erekshe jaǵdaida jumys isteýde. Tótenshe jaǵdai kezinde Parlamentte basqarýshylyq sheshimder qabyldaýdyń jańa úlgisi qoldanyla bastady. Ol zań jobalaryn qashyqtyqtan talqylaý júiesi. Biz úshin barlyq múddeli taraptardyń, depýtattardyń, memlekettik organdar men azamattyq qoǵamnyń úzdiksiz qashyqtyqtan jumys isteýin qamtamasyz etetin beine bailanys, selektorlyq keńester jáne basqa da zamanaýi aqparattyq tehnologiialar múmkindigin barynsha paidalaný mańyzdy boldy. Erekshe aitý kerek, zań jobalaryn maquldaýdyń qarqyny men sapasy tómendegen joq. Óz ýaqytynda jedel ári tiimdi sheshimder qabyldandy», - dep atap ótti.
Sonymen qatar, konferentsiiada Májilis Tóraǵasy eń aldymen, depýtattar ulttyq ekonomika, aýyl sharýashylyǵy, halyqty áleýmettik qoldaý, densaýlyq saqtaý salasyndaǵy júieli sharalar, epidemiologiialyq jaǵdaidy turaqtandyrý, bilim berýdiń barlyq deńgeileriniń sapasy máselelerin erekshe baqylaýǵa alǵanyn jetkizdi.
Sondai-aq, palata Spikeri Nurlan Nyǵmatýlin búginde elimizde ekonomikalyq ósimdi qalpyna keltirý, shaǵyn jáne orta biznesti qoldaý, halyqtyń áleýmettik ál-aýqatyn nyǵaitý boiynsha jumystar belsendi júrgizilip jatqanyna nazar aýdardy.
.jpeg)