Búgin Májiliste Qazaqstanda tirkelgen partiia ókilderiniń kezdesýi ótip, otyrys barysynda Palata tóraǵasy Nurlan Nyǵmatýlin Májilis janynan partiiaaralyq Keńes qurýdy usyndy, dep habarlaidy "Ult aqparat".
Májiliste ótken jiynǵa «Adal», «Aq jol», «Aýyl» partiialarynyń jáne Qazaqstan Halyq partiiasynyń, «Nur Otan» jáne JSDP ókilderi jinaldy.
«Árqaisymyzdyń alǵa qoiǵan josparlarymyz, mindetterimiz, jumys jasaý tásilderimiz ártúrli bolǵanymen, maqsatymyz bir. Ol – Elbasymyz Nursultan Ábishuly Nazarbaevtyń, Memleket basshysy Qasym-Jomart Kemeluly Toqaevtyń elimizdi damytý bastamalaryn qoldap, halqymyzdyń ómir sapasyn jaqsartýǵa yqpal etýge úles qosý», - dedi otyrysta Nurlan Nyǵmatýlin.
Osy jolda Májilis árqashanda qoǵamdyq uiymdarmen, táýelsiz sarapshylarmen, jýrnalistermen ashyq, qoljetimdi jáne jariia jumys istep kele jatqanyn alǵa tartqan Palata spikeri: «Májilis janynan partiiaaralyq Keńesti uiymdastyrýdy usyna otyryp, biz, eń aldymen, parlamenttik jáne parlamenttik emes partiialardyń dialogyn keńeitý úshin jańa múmkindikter ashqymyz keledi. Osy jańa pikirtalas alańynda ázirlenetin talqylaýlar, usynystar, usynymdar zań shyǵarý protsesin odan da tiimdi etýge múmkindik beredi dep úmittenemiz. Jalpy, bizdiń partiiaaralyq keńes aiasyndaǵy yntymaqtastyǵymyz ózekti máselelerdi sheshýdiń taǵy bir quraly bola alady, - dedi.
Májilis spikeriniń pikirinshe, partiiaaralyq keńes konsýltativtik-keńesshi organ bolýy tiis. Sonymen qatar, Nurlan Nyǵmatýlin depýtattyq korpýstyń partiia ókilderiniń qandai da bir zań jobalary boiynsha jumys toptarynyń quramyna kirýine múddeliligin bildirdi.
«Sizderdiń ideialaryńyz, usynystaryńyz is júzinde júzege asyrylýy kerek. Biz birlesken jumysqa daiynbyz. Mundai yntymaqtastyq parlamenttik emes partiialar úshin de paidaly bolady dep oilaimyn», - dedi Májilis spikeri kezdesýge qatysýshylarǵa arnaǵan sózinde.
Otyrys barysynda «Aýyl» patriottyq partiiasy tóraǵanyń birinshi orynbasary T. Rahymbekov, Jalpyulttyq sotsial-demokratiialyq partiianyń tóraǵasy A. Rahymjanov jáne «Adal» partiiasynyń hatshysy E. Jumaǵaziev Májilis tóraǵasy usynǵan bastamany qoldap, bul Májilis jumysyndaǵy jańa betburys ekenin aitty.
Sonymen qatar, Nurlan Nyǵmatýlin Ulttyq qoǵamdyq senim keńesiniń V otyrysynda el Prezidenti Qasym-Jomart Toqaevtyń kótergen tapsyrmalaryna, sonyń ishinde jańa zań jobalaryn ázirleýge qatysty máselelerge nazar aýdardy.
- Biz partiiaaralyq Keńestiń turaqty jumys isteitin jumys alańyna ainalýyn qamtamasyz etýimiz kerek. Onda usynymdar ázirlenedi, sodan keiin olar Parlamenttegi zańnamalyq protsestiń barlyq satylarynda paidalanylatyn bolady, - dedi sózin qorytyndylaǵan Májilis tóraǵasy.
