Májilis Tóraǵasy Nurlan Nyǵmatýlin Vetnamǵa resmi sapary barysynda Hanoi ýniversitetindegi Abai ortalyǵyna bardy. Sonymen qatar, ustazdar jáne stýdentter qaýymymen kezdesti, dep habarlaidy QR Parlamenti Májilisiniń baspasóz qyzmeti.
Abai atyndaǵy ǵylymi-mádeni ortalyq 2013 jyly ashylǵan. Búginde atalǵan ortalyqta uly oishyldyń 175 jyldyq mereitoiyna qyzý daiyndyq júrip jatyr.
Nurlan Nyǵmatýlin eki eldiń mádeni-gýmanitarlyq yntymaqtastyǵyna airyqsha nazar aýdara kelip, danyshpan Abaidyń mereitoiyna daiyndyq sharalaryna toqtaldy.
Sondai-aq, ortalyqqa arnaiy ákelgen kitaptardy syiǵa tartty. Atalǵan ýniversitet biyl qurylǵanyna 60 jyl tolatyn kóne oqý oryndarynyń biri.
Kezdesýge jinalǵan ustazdar men stýdentter aldynda Nurlan Nyǵmatýlin táýelsiz Qazaqstannyń qalyptasý, damý kezeńderi boiynsha jetistikterge toqtala kelip, Vetnam eliniń ekonomikalyq tabystaryna da kóńil bóldi.
Ásirese, kezdesý barysynda qos memleket arasyndaǵy jan-jaqty ózara is-qimyldy tereńdetý áńgime ózegine ainaldy. Stýdenttermen júzdesý kezinde sapaly bilim taqyrybyna sóz arnaǵan Májilis Tóraǵasy qazirgi «bilim ekonomikasy» dáýirinde onyń mańyzdylyǵy arta túskenin atap aitty.
Nurlan Nyǵmatýlin qazaqstandyq-vetnamdyq yqpaldastyqtyń áleýeti zor ekenin alǵa tarta kelip, kólik-logistika, jeńil jáne tamaq ónerkásibi, aýylsharýashylyǵy, sondai-aq, týrizm salalarynynyń basymdyqtaryn atap ótti.
Osy rette Palata Spikeri bilim baǵytynda, kásipkerlik qurylymdary arasynda tyǵyz bailanys ornatýdyń mańyzdylyǵyna kóńil bóldi. Óz kezeginde stýdentter Eýraziialyq Ekonomikalyq Odaq pen Vetnam arasyndaǵy erkin saýda aimaǵy týraly Kelisimniń Qazaqstan men Vetnam úshin tiimdi baǵyttary, elderimiz parlamentteriniń erekshelikteri týraly qyzyǵýshylyq tanytty.
Sonymen qatar, bolashaqta suranysqa ie mamandyqtar, depýtattar jumysynda áleýmettik jelilerdiń mańyzdylyǵy jóninde Májilis tóraǵasynyń pikirine nazar aýdardy.
