Májilis spikeri Nurlan Nyǵmatýlin UQK Shekara qyzmeti men syrtqy ister ministrligine júginip, Qyrǵyzstanmen shekaradaǵy uzyn-sonar kezek máselesin sheshýdi talap etti, dep habarlaidy Sputnik Qazaqstan tilshisi.
Májilistiń jalpy otyrysynda depýtat Záýresh Amanjolova Ulttyq qaýipsizdik komitetiniń shekara qyzmetine shekaradaǵy kezekke qatysty saýal joldady.
"Qoldaǵy bar aqparatqa súiensek, Qazaqstan-Qyrǵyzstan shekarasynyń boiynda 8 shekaralyq ótkizý pýnkti jumys isteidi. Sonymen qatar Qordai men Qarasý baqylaý-ótkizý pýnkterinde jyl saiyn jolaýshylar men kólikterdiń ósýi baiqalady. Ásirese, kólik aǵyny kýrorttyq maýsym kezinde ósedi. Máselen, jolaýshylar men avtokólikterdiń jaz ailarynda ótý qarqyny eki ese ulǵaiady. Sonyń saldarynan el azamattary uzaq ýaqyt kezekte turýǵa májbúr. Osyǵan bailanysty meniń mynadai suraǵym bar: eki eldiń shekarasy arqyly jolaýshylar men mashinalardy ótkizý jumysyn ońtailandyrý boiynsha sizder jaqtan qandai is-sharalar qolǵa alynyp jatyr?", — dep surady halyq qalaýlysy.
UQK Shekara qyzmetiniń direktory Darhan Dilmanov búginde eki el shekarasynda 8 shekara beketi jumys isteitinin rastady. Onyń 7-ýi – avtokólik jáne bireýi – temirjol.
"Negizgi ótkizý pýnkteri – Qordai, Aýhatty jáne Sarytóbe. Jazǵy demalys kezinde Qordai biz jaqtan da, Qyrǵyzstan jaǵynan da adamǵa lyq toly. Osyǵan bailanysty biz qujat tekserý jelilerinde ulǵaitý sharalaryn qolǵa alyp jatyrmyz. Sońǵy eskertýlerden keiin 36 danaǵa deiin ulǵaittyq: 18-i – shyǵa beriste, qalǵan 18-i kire beriste", —dedi Dilmanov.
Májilis spikeri bul jetkilikti me dep surady.
"Biyl da jaǵdai qaitalandy – uzyn-sonar kezek. Sizder ulǵaittyq dep aitqanmen, BAQ-ta oqiǵa ornynan túsirilgen reportajdar shyqty. Uzyn-sonar kezek sol kúii qalǵan", — dedi Nyǵmatýlin.
Dilmanov rekonstrýktsiiadan keiin qujat tekserýge arnalǵan oryndar 60-qa deiin ulǵaiatynyn málimdedi.
"Darhan Aitqaliuly, osy pýnkterdi keńeitý kerek, XXI ǵasyrǵa sai jaǵdai jasaý kerek. Kelisesiz be? Osyndai jospar bar ma sizderde?", — dep surady jaýapqa qanaǵattanbaǵan spiker.
"Shekara qyzmetinde mundai jospar joq, óitkeni ótkizý pýnkterin ashýǵa biz emes, investitsiialar jáne damý ministrligi jaýapty. Biraq biz pýnkterdiń ótkizý múmkindigin ulǵaitýǵa daiynbyz", — dedi shekara qyzmetiniń direktory.
Osydan keiin Nyǵmatýlin syrtqy ister ministriniń birinshi orynbasary Muhtar Tileýberdige júginip, atalǵan máselege qatysty keshendi sheshim qabyldaý qajettigin aitty.
"Muhtar Beskenuly, syrtqy ister ministrligi bul máselede múddeli memlekettik organdardyń jumysyn úilestirýi kerek shyǵar. Shekara boiynsha túsinikti, olardyń óz fýnktsiiasy bar. Biraq jyl saiyn halyqtan da, Memleket basshysynan da eskertý estip jatyrmyz. Adamdar shaǵymdanady, elshilik, syrtqy saiasi vedomstvo arqyly hat jazady. Osy máselege qatysty bir keshendi sheshim qabyldap, sońyna deiin jetkizýimiz kerek. Birlesip jumys isteý qajet",- dedi spiker.
