Parlament Májilisiniń tóraǵasy Nurlan Nyǵmatýlin Ekologiialyq kodekstiń jobasyn qatań synǵa aldy, dep habarlaidy QazAqparat tilshisi.
Aita ketsek, Parlament Májilisiniń otyrysynda Ekologiia, geologiia jáne tabiǵi resýrstar ministri Maǵzum Myrzaǵaliev Ekologiialyq kodekstiń jobasyn qorǵaǵan bolatyn.
Zań jobasy boiynsha Parlamet Májilisiniń tóraǵasy Nurlan Nyǵmatýlin pikirin bildirdi.
«Zań jobasyn qarasaq bylai: máselen Qaraǵandy oblysynyń Ulytaý aýdanynyń turǵynynyń 5-10 taýyǵy bar delik. Ony deklaratsiialaý úshin ol oblystyq tabiǵi resýrstar basqarmasyna barýy kerek. Al ol oblys ortalyǵynda ornalasqan. Iaǵni, ol tipti 5 emes, tipti 1 taýyǵyn deklaratsiialaý úshin 700 shaqyrymdy júrýi kerek. Kodekste osylai jazylǵan. Nelikten olai? Siz kodekste (Maǵzum Myrzaǵalievke qarata) «100 jáne odan tómen bas úshin» dep jazasyz. Oǵan, iaǵni, mal bolsyn, qus bolsyn kiredi. Ol sanǵa 99 maldy da, 1 maldy da kirgizýge bolady. Álbette bir tabynnyń bir taýyqqa qaraǵanda ekologiiaǵa tigizetin áseri mol ekenin aldymen túsinip alý kerek. Bul normany jazǵan kezde oilaný kerek bolatyn», - dedi Nurlan Nyǵmatýlin.
Májilis tóraǵasy zań jobasyn osyndai normalaryn oqyǵan kezde «bul normany jazǵan adam aýylda boldy ma?» degen suraq týyndaitynyn aityp ótti.
«Bolmaǵan shyǵar. Shirkin, osy normany jazǵan adamdy 2-3 aiǵa aýylǵa jiberse ǵoi. Sonda ǵana ol adam taýyq pen siyrdyń aiyrmashylyǵyn túsinetin edi. Qalai oilaisyz, ministr myrza? Kodeksti qabyldaǵannan keiin aýylǵa baryp kelińiz», - degen Nurlan Nyǵmatýlin ekinshi oqylymda osy olqylyqtardy retke keltirýdi tapsyrdy.
