Májilis tóraǵasy Nurlan Nyǵmatýlin 2021-2023 jyldarǵa arnalǵan respýblikalyq biýdjettiń jobasyn maquldaý barysynda biýdjette eń aldymen, pandemiia kezinde azamattardy qoldaý jaǵdaiy eskerilgenin atap ótti. Bul týraly "Ult aqparat" tómengi palatanyń baspasóz qyzmetine silteme jasap habarlaidy.
Elimizdiń bas qarjy qujaty boiynsha depýtattar aldynda Ulttyq ekonomika ministri Rýslan Dálenov, Qarjy ministri Erulan Jamaýbaev jáne Ulttyq bankiniń tóraǵasy Erbolat Dosaev baiandama jasady.
Zań jobalaryn talqylaý barysynda depýtattar jaýapty memlekettik organdardyń basshylaryna birqatar suraqtar qoiyp, óz pikirlerimen bólisti.
Osy rette, Májilis tóraǵasy Nurlan Nyǵmatýlin pandemiia kezinde shaǵyn jáne orta biznesti qoldaý qazirgi eń mańyzdy jáne eń qajetti suraqtardyń biri ekenin aitty.
Osy jolda Elbasynyń da, Memleket basshysynyń tapsyrmasy da bar. Tiisti qarajat biýdjette qaralyp otyr. Endi, eń bastysy, osy barlyq qarajat - qoljetimdi bolýy kerek. Bul árine, Úkimettiń, Ulttyq banktiń mindeti, - dedi ol. Sonymen birge Palata spikeri jeńildetilgen nesieni júzege asyratyn mehanizm de ashyq jáne túsinikti bolý kerektigin, sonda ǵana azamattarymyz, shaǵyn jáne orta bizneste, osy qiyn kezeńde jumys istei alatynyn aitty.
Úsh jyldyq biýdjet jobasyn talqylaý barysynda depýtat Á.Bekturǵanov pedagogtardyń jalaqysyn 25%-ǵa arttyrý kezinde sporttyq jattyqtyrýshy mamandar arasynda olqylyqtyń oryn alǵanyn aitty. Mysaly, respýblikalyq deńgeidegi sport-muǵalimderine qosymsha qarajat qaralyp, al ákimdikter janyndaǵy sporttyq uiymdardyń pedagogtary bul qoldaýdan tys qalǵan. Jaqynda ǵana biýdjetti naqtylaý kezinde osy olqylyqtyń ornyn toltyrý úshin 5 mlrd teńge qarjy qaraldy.
Osy rette Májilis tóraǵasy aldaǵy ýaqytta mundai jaǵdaiǵa jol berýge bolmaityndyǵyn basa atap ótti.
Sonymen qatar biýdjettik zań jobany talqylaý barysynda memlekettiń turaqty damýyna ekonomikalyq jáne áleýmettik ahýalǵa qatysty suraqtar jan-jaqty qaraldy. Nátijesinde 2021-2023 jyldarǵa arnalǵan respýblikalyq biýdjetti maquldaý jónindegi qaýly qabyldandy.
«Búgingi maquldanǵan biýdjet jobasynyń orny da erekshe, mańyzy da óte zor. Búkil álemge taraǵan koronovirýs indeti bizdiń elimizde de oryn alyp otyr. Sondyqtan, aldaǵy úsh jyldyq biýdjette eń birinshiden, pandemiia kezinde azamattardy qoldaý jaǵdaiy eskerildi. Sonymen birge, jyldaǵy dástúr boiynsha ekonomikany damytý, áleýmettik mindetter, densaýlyq, bilim, eńbek salalaryna erekshe nazar aýdaryldy. Sebebi, respýblikalyq biýdjetti qalyptastyrý – bul Elbasy jáne Memleket basshysy júktegen barlyq mindetterdi sapaly oryndaýdyń kepili. Endi Úkimettiń de, barlyq memlekettik organdardyń da negizgi jumysy ol osy bólingen qarajattardy jospar boiynsha óz ýaqytynda, ashyq, sapaly jáne nátijeli paidalaný. Al ony baqylaý árqashanda depýtattyq korpýstyń nazarynda bolady», - dedi Nurlan Nyǵmatýlin.
