Parlament Májilisiniń tóraǵasy Nurlan Nyǵmatýlin «Kazakh Invest» Ulttyq kompaniiasynyń basshylyǵyna shetelde ókildikterdi ashýǵa erekshe nazar aýdarýdy surady, dep habarlaidy QazAqparat tilshisi.
Búgingi Májilistiń jalpy otyrysynda «Kazakh Invest» basshysy Saparbek Tuiaqbaev shetelden investitsiialardy tartý baǵytynda Qytai, Túrkiia, Frantsiia, Germaniia men AQSh-ta bes ókildik jumys istep jatqanyn atap ótti. Endi aldaǵy ýaqytta kompaniia taǵy Niý-Iork pen Londonda, BAÁ-de taǵy úsh ókildik ashpaq. Dál osyǵan kelgende Nurlan Nyǵmatýlin bul sheshimge qatysty oi-pikirin bildirdi.
«Kezinde «Samuryq-Qazyna» ondaǵan ókildikterin qysqartqan edi. Endi basqa amalmen kele jatyrmyz. Kez kelgen tapsyrma, bastama nemese memlekettik baǵdarlama bastala qalsa, AQ qura ketemiz. Sodan keiin bastyqtardy, orynbasarlary men sheteldik keńesshilerdi qaptatamyz. Ótinemin, osyǵan kelgende erekshe nazar aýdaryńyz», - dedi Nurlan Nyǵmatýlin «2018-2020 jyldarǵa arnalǵan respýblikalyq biýdjet týraly» QR Zańyna ózgerister men tolyqtyrýlar engizý týraly» zańynyń jobasyn talqylaý kezinde.
Otyrys kezinde depýtat Sergei Simonovtyń aitýynsha, jalpy, Qazaqstanǵa investitsiialardy tartý boiynsha 2018 jyly biýdjetten 4,4 mlrd teńge bólý qarastyrylyp otyr. Jobany aiqyndaý kezinde taǵy 1,1 milliard teńge bólý josparlanǵan. Iaǵni, atalǵan baǵytta biyl 5,5 mlrd teńge jumsalmaq.
