پارلامەنت مەجٸلٸسٸنٸڭ تٶراعاسى نۇرلان نىعماتۋلين «Kazakh Invest» ۇلتتىق كومپانيياسىنىڭ باسشىلىعىنا شەتەلدە ٶكٸلدٸكتەردٸ اشۋعا ەرەكشە نازار اۋدارۋدى سۇرادى, دەپ حابارلايدى قازاقپارات تٸلشٸسٸ.
بٷگٸنگٸ مەجٸلٸستٸڭ جالپى وتىرىسىندا «Kazakh Invest» باسشىسى ساپاربەك تۇياقباەۆ شەتەلدەن ينۆەستيتسييالاردى تارتۋ باعىتىندا قىتاي, تٷركييا, فرانتسييا, گەرمانييا مەن اقش-تا بەس ٶكٸلدٸك جۇمىس ٸستەپ جاتقانىن اتاپ ٶتتٸ. ەندٸ الداعى ۋاقىتتا كومپانييا تاعى نيۋ-يورك پەن لوندوندا, باە-دە تاعى ٷش ٶكٸلدٸك اشپاق. دەل وسىعان كەلگەندە نۇرلان نىعماتۋلين بۇل شەشٸمگە قاتىستى وي-پٸكٸرٸن بٸلدٸردٸ.
«كەزٸندە «سامۇرىق-قازىنا» ونداعان ٶكٸلدٸكتەرٸن قىسقارتقان ەدٸ. ەندٸ باسقا امالمەن كەلە جاتىرمىز. كەز كەلگەن تاپسىرما, باستاما نەمەسە مەملەكەتتٸك باعدارلاما باستالا قالسا, اق قۇرا كەتەمٸز. سودان كەيٸن باستىقتاردى, ورىنباسارلارى مەن شەتەلدٸك كەڭەسشٸلەردٸ قاپتاتامىز. ٶتٸنەمٸن, وسىعان كەلگەندە ەرەكشە نازار اۋدارىڭىز», - دەدٸ نۇرلان نىعماتۋلين «2018-2020 جىلدارعا ارنالعان رەسپۋبليكالىق بيۋدجەت تۋرالى» قر زاڭىنا ٶزگەرٸستەر مەن تولىقتىرۋلار ەنگٸزۋ تۋرالى» زاڭىنىڭ جوباسىن تالقىلاۋ كەزٸندە.
وتىرىس كەزٸندە دەپۋتات سەرگەي سيمونوۆتىڭ ايتۋىنشا, جالپى, قازاقستانعا ينۆەستيتسييالاردى تارتۋ بويىنشا 2018 جىلى بيۋدجەتتەن 4,4 ملرد تەڭگە بٶلۋ قاراستىرىلىپ وتىر. جوبانى ايقىنداۋ كەزٸندە تاعى 1,1 ميلليارد تەڭگە بٶلۋ جوسپارلانعان. ياعني, اتالعان باعىتتا بيىل 5,5 ملرد تەڭگە جۇمسالماق.
