Eńbek jáne halyqty áleýmettik qorǵaý ministri Birjan Nurymbetov «Eńbek» baǵdarlamasy boiynsha áielderge nesie berý kólemi ulǵaitylǵanyn málim etti, dep habarlaidy QazAqparat.
«Aýyldyń órkendeýine áielderdiń qosyp jatqan úlesi óte zor. Áielderdiń bastamalaryna, aýyl áielderine qoldaý kórsetý – mańyzy bar is. Búgin de bizdiń eńbek naryǵy jumyspen qamtýshy áielderdiń joǵary deńgeii men bilikti qyzmetkerlerdiń bolýymen sipattalady. Resmi statistikaǵa júginsek, bizdiń elimizde ekonomikalyq belsendi halyqtyń sany 9 mln 200 myńǵa jetti. Onyń jartysy – 4,5 milliony áielder. Olardyń 95 paiyzy jumyspen qamtylǵan. Onyń ishinde 1 mln 100 myńy aýylda eńbek etip jatqan áielder», - dedi Qazaqstannyń aýyl áielderiniń III forýmyna onlain rejiminde qatysqan Birjan Nurymbetov.
Onyń aitýynsha ministrlik óz tarapynan jumyspen qamtý, kásipkerlik bastamalardy qoldaý, zamanǵa sai daǵdylardy úiretý baǵytynda birqatar sharýa atqarylyp keledi.
«Elimizde iske asyrylyp jatqan «Eńbek» baǵdarlamasy halqymyzdy jumyspen qamtýǵa baǵyttalǵan. Bizdiń baǵdarlamada áielderge erekshe mańyz berilgen. Biyl osy baǵdarlama boiynsha 246 myń áiel qatysty. Onyń ishinde aýylda turatyndary – 123 myń adam. Osy jyly biz óz tarapymyzdan baǵdarlamaǵa ózgeris engizip, áielderge nesie berý sharalary keńeitildi. Bizde osy jyldan bastap kópbalaly analar, az qamtylǵan otbasylar nesie alyp jatyr. Olar 22 mln teńgege deiin ala alady», - dedi ol.
