Qazaqstan Respýblikasynyń Tuńǵysh Prezidenti Nursultan Nazarbaevtyń tóraǵalyǵymen Qaýipsizdik Keńesiniń otyrysy ótti, dep habarlaidy "Ult aqparat" Elbasynyń resmi saityna silteme jasap.
Jiynda Qazaqstan Respýblikasynyń 2021-2025 jyldarǵa arnalǵan Ulttyq qaýipsizdik strategiiasynyń negizgi baǵyttary, sondai-aq Qarýly kúshterdi qaita jaraqtandyrý men qorǵanys ónerkásibin damytý josparlary qaraldy.
Jiyndy ashqan Qaýipsizdik Keńesiniń Tóraǵasy búgingi tańda basqa eldermen qatar Qazaqstan da qaýipsiz ortanyń sapalyq ózgerý kezeńine qadam basqanyn atap ótti.
– Biz birtutas memleket jáne ult retinde betburys kezeńine kelip jettik. Bul ózgeriske koronavirýs pandemiiasy túrtki boldy. Onyń áseri aldaǵy onjyldyqqa sozylýy múmkin. Qazirdiń ózinde ulttyq qaýipsizdikke qatysty qalyptasqan syn-qaterler transformatsiiaǵa ushyrap, assimetriialyq ári gibridtik qaterler týyndap jatyr, – dedi Elbasy.
Nursultan Nazarbaev Qazaqstan Respýblikasy men qazaqstandyq qoǵamnyń qazirgi jaǵdailarǵa jaýap bere alatyn jańa ulttyq qaýipsizdik arhitektýrasyn jasaý qajettigin atap ótti.
– Ekonomikalyq, tehnologiialyq, áleýmettik ahýal men syrtqy jaǵdailar qalai ózgerse de, bizdiń eshqashan myzǵymaityn ulttyq múddelerimiz bar. Bul – Qazaqstannyń egemendigi, aýmaqtyq tutastyǵy, birlik, saiasi turaqtylyq, azamattardyń ál-aýqaty jáne áleýmettik ádildik. Ulttyq qaýipsizdik strategiiasy osy qundylyqtardy qorǵaýǵa, biyl 30 jyldyǵyn atap ótip jatqan Táýelsizdigimizdi nyǵaitýǵa negizdelgen, – dedi Qazaqstannyń Tuńǵysh Prezidenti.
Kún tártibindegi birinshi máseleni talqylaý barysynda Prezidenttiń Kómekshisi – Qaýipsizdik Keńesiniń Hatshysy Á.Isekeshev jańa Strategiianyń negizgi baǵyttaryn tanystyrdy. Onda qamtylǵan sharalarǵa táýekelderdi basqarýdyń zamanaýi ádisteri basshylyqqa alynyp, ulttyq qaýipsizdik teńgerimdi áleýmettik-ekonomikalyq jáne qoǵamdyq-saiasi damýmen berik bailanysqan.
Nursultan Nazarbaev biologiialyq qaýipsizdik máselesi kún tártibinen uzaq ýaqytqa deiin túspeitinine nazar aýdardy, sebebi infektsiialyq jáne basqa da aýrýlar jahandyq syn-qaterlerge ainaldy. Osyǵan orai Elbasy biologiialyq qaýipsizdik pen qoǵamdyq densaýlyq saqtaý salasyndaǵy basty qaýip-qaterlerge toitarys berý úshin tiimdi sharalardyń mańyzdylyǵyn atap kórsetti.
– Endi densaýlyq saqtaýǵa ulttyq qaýipsizdik pen áleýmettik turaqtylyqtyń negizgi komponenti retinde qaraý kerek. Pandemiia kezinde áleýmettik-ekonomikalyq tejelister bolady. Ol – birinshi kezekte, halyqtyń tabysynyń azaiýy, óńirlerdiń, salalardyń, qalalar men aýyldardyń arasyndaǵy teńsizdikterdiń ósýi. Bul baǵytta maqsatty túrde jumys isteý kerek. Áleýmettik turǵydan az qamtylǵan turǵyndarǵa keshendi qoldaý kórsetý qajet, – dedi Qaýipsizdik Keńesiniń Tóraǵasy.
Nursultan Nazarbaev ekonomikalyq qaýipsizdikti, kiberqaýipsizdikti, aqparattyq qaýipsizdik pen adami kapitaldyń qaýipsizdigin qamtamasyz etý máselelerine erekshe nazar aýdardy.
– Naǵyz qaýip – mineraldy-shikizat resýrstary baǵasynyń quldyraýy emes, ulttyń intellektýaldyq áleýetiniń tómendeý qaýpi. Bul, birinshi kezekte, bilim berýge qatysty. Biz osy sala boiynsha damyǵan elderden áli artta kelemiz. Bilim men ilim taiaý onjyldyqta bizdiń ulttyq ideiamyz bolýy kerek, – dep atap ótti Elbasy.
Sonymen qatar Elbasy ulttyq qaýipsizdiktiń dástúrli túrleri – syrtqy jáne áskeri qaýipsizdikke toqtaldy. Mundaǵy negizgi syn-qaterler syrtqy kúshterdiń ózara teketiresine, Ortalyq Aziia men onyń tóńireginde turaqsyz aimaqtardyń qurylý múmkindigine, terroristik, radikaldy, qylmystyq jáne basqa da iritki salýshy kúshterdiń óńirde shoǵyrlanýyna bailanysty.
Talqylaý qorytyndysy boiynsha otyrysqa qatysýshylar Qazaqstan Respýblikasynyń jańa Ulttyq qaýipsizdik strategiiasynyń tujyrymdyq ustanymdaryn maquldady.
Sondai-aq, talqylaý barysynda Qazaqstan Respýblikasynyń áskeri qaýipsizdigin laiyqty qamtamasyz etýge tiis Qarýly kúshterdi damytý máseleleri qaraldy.
Elbasy jańa tehnologiialar engizýdi jáne qarý-jaraq pen áskeri tehnika óndirisindegi tehnologiialyq progresti esepke ala otyryp, qarýly kúshterdi jetildirý qajettigine de toqtaldy.
– Qarýly kúshterdi 2030 jylǵa deiin qaita jaraqtandyrý jáne qorǵanys ónerkásibin damytý tujyrymdamasy armiiany jabdyqtaýdyń uzaq merzimge arnalǵan tásilderin aiqyndaidy jáne jańa tehnologiialyq syn-qaterlerge sai keledi. Otandyq qorǵanys ónerkásibi – qorǵanys qabiletiniń mańyzdy bóligi, ol Qarýly kúshterdiń suranysyna baǵyttalǵan, – dedi Qazaqstannyń Tuńǵysh Prezidenti.
Otyrys qorytyndysy boiynsha Nursultan Nazarbaev Qarýly kúshterdiń, basqa áskerler men kúshtik qurylymdardyń áskeri daiyndyq deńgeiin kóterýge, aýmaqtyq qorǵanys kúshterin nyǵaitýǵa baǵyttalǵan birqatar naqty tapsyrma berdi.
