Aqtóbe qalasynda «Týǵan jer» respýblikalyq forýmy ótti. Elbasy Nursultan Ábishuly forým qatysýshylaryna quttyqtaý hatyn joldady. Hatty QR Memlekettik hatshysy Gúlshara Ábdiqalyqova oqyp berdi.
Hattyń tolyq mátini tómendegidei:
«Týǵan jer» respýblikalyq forýmyna qatysýshylarǵa!
Qazaqstan qasterli Táýelsizdiginiń úshinshi múshelin zor rýhani jańǵyrýmen bastady.
Meniń baǵdarlamalyq maqalamnyń aiasynda elimizdiń barlyq aimaqtarynda keń aýqymdy jumystar qolǵa alyndy.
«Rýhani jańǵyrýdyń» negizinde júzege asyrylyp jatqan airyqsha mańyzdy jobalardyń biri – «Týǵan jer».
Árkimniń kindik qany tamǵan týǵan jeri qaida júrse de júreginiń tórinde.
Bizdiń árqaisymyz týǵan ólkemizdi maqtan etemiz, alys júrsek saǵynamyz, qamqorlyq jasaimyz.
Týǵan jerge ińkárlik Týǵan elge súiispenshilikpen ulasady.
Týǵan jerge qamqorlyq Týǵan elge janashyrlyqpen astasady.
Jalpyulttyq patriotizmniń ózegi ispetti «Týǵan jer» baǵdarlamasy osyndai izgi nietter men sharalardy júielep, ortaq igilikke ainaldyrýdy kózdeidi.
Forýmǵa elimizdiń barlyq óńirlerimen qatar, 20 memlekette turyp jatqan aqtóbelikterdiń arnaiy kelýi – bizdiń ulttyq biregeiligimizdi, týǵan elge degen shynaiy patriottyq sezimderimizdi aishyqtai túsedi.
Búgin Aqtóbeden bastaý alǵan igi shara elimizdiń basqa óńirlerinde jalǵasyn tabaryna senimdimin.
Sizder shynaiy patriotizm – «Máńgilik Eldiń» myzǵymas tuǵyry ekenin bek túsinip, osynaý patriottyq sezimdi barsha zamandastaryńyzǵa jetkizýlerińizdi tileimin!
Súiikti Qazaqstanymyz gúldene bersin!
Mereimiz asyp, birligimiz tasi bersin!
Máńgilik Eldiń kók bairaǵy árqashan asqaq jelbiresin!
Qazaqstan
Respýblikasynyń
Prezidenti
Nursultan Nazarbaev
2017 jylǵy 28 qyrkúiek
