اقتٶبە قالاسىندا «تۋعان جەر» رەسپۋبليكالىق فورۋمى ٶتتٸ. ەلباسى نۇرسۇلتان ەبٸشۇلى فورۋم قاتىسۋشىلارىنا قۇتتىقتاۋ حاتىن جولدادى. حاتتى قر مەملەكەتتٸك حاتشىسى گٷلشارا ەبدٸقالىقوۆا وقىپ بەردٸ.
حاتتىڭ تولىق مەتٸنٸ تٶمەندەگٸدەي:
«تۋعان جەر» رەسپۋبليكالىق فورۋمىنا قاتىسۋشىلارعا!
قازاقستان قاستەرلٸ تەۋەلسٸزدٸگٸنٸڭ ٷشٸنشٸ مٷشەلٸن زور رۋحاني جاڭعىرۋمەن باستادى.
مەنٸڭ باعدارلامالىق ماقالامنىڭ اياسىندا ەلٸمٸزدٸڭ بارلىق ايماقتارىندا كەڭ اۋقىمدى جۇمىستار قولعا الىندى.
«رۋحاني جاڭعىرۋدىڭ» نەگٸزٸندە جٷزەگە اسىرىلىپ جاتقان ايرىقشا ماڭىزدى جوبالاردىڭ بٸرٸ – «تۋعان جەر».
ەركٸمنٸڭ كٸندٸك قانى تامعان تۋعان جەرٸ قايدا جٷرسە دە جٷرەگٸنٸڭ تٶرٸندە.
بٸزدٸڭ ەرقايسىمىز تۋعان ٶلكەمٸزدٸ ماقتان ەتەمٸز, الىس جٷرسەك ساعىنامىز, قامقورلىق جاسايمىز.
تۋعان جەرگە ٸڭكەرلٸك تۋعان ەلگە سٷيٸسپەنشٸلٸكپەن ۇلاسادى.
تۋعان جەرگە قامقورلىق تۋعان ەلگە جاناشىرلىقپەن استاسادى.
جالپىۇلتتىق پاتريوتيزمنٸڭ ٶزەگٸ ٸسپەتتٸ «تۋعان جەر» باعدارلاماسى وسىنداي ٸزگٸ نيەتتەر مەن شارالاردى جٷيەلەپ, ورتاق يگٸلٸككە اينالدىرۋدى كٶزدەيدٸ.
فورۋمعا ەلٸمٸزدٸڭ بارلىق ٶڭٸرلەرٸمەن قاتار, 20 مەملەكەتتە تۇرىپ جاتقان اقتٶبەلٸكتەردٸڭ ارنايى كەلۋٸ – بٸزدٸڭ ۇلتتىق بٸرەگەيلٸگٸمٸزدٸ, تۋعان ەلگە دەگەن شىنايى پاتريوتتىق سەزٸمدەرٸمٸزدٸ ايشىقتاي تٷسەدٸ.
بٷگٸن اقتٶبەدەن باستاۋ العان يگٸ شارا ەلٸمٸزدٸڭ باسقا ٶڭٸرلەرٸندە جالعاسىن تابارىنا سەنٸمدٸمٸن.
سٸزدەر شىنايى پاتريوتيزم – «مەڭگٸلٸك ەلدٸڭ» مىزعىماس تۇعىرى ەكەنٸن بەك تٷسٸنٸپ, وسىناۋ پاتريوتتىق سەزٸمدٸ بارشا زامانداستارىڭىزعا جەتكٸزۋلەرٸڭٸزدٸ تٸلەيمٸن!
سٷيٸكتٸ قازاقستانىمىز گٷلدەنە بەرسٸن!
مەرەيمٸز اسىپ, بٸرلٸگٸمٸز تاسي بەرسٸن!
مەڭگٸلٸك ەلدٸڭ كٶك بايراعى ەرقاشان اسقاق جەلبٸرەسٸن!
قازاقستان
رەسپۋبليكاسىنىڭ
پرەزيدەنتٸ
نۇرسۇلتان نازارباەۆ
2017 جىلعى 28 قىركٷيەك
