QR Tuńǵysh Prezidenti - Elbasy Nursultan Nazarbaev Nur Otan partiiasynyń kezekten tys XX Sezin qorytyndylap, sóz sóiledi, dep habarlaidy QazAqparat.
«Ár partiia úshin sezd ótkizý - óte úlken másele, óte úlken kezeń, óte úlken jumys sanalady. Sezd ótken saiyn ótkenge qarap, qandai tabystarǵa jetkenimizdi, halyq aldyndaǵy baǵdarlamamyzdyń oryndalý barysyn qorytyndylaimyz. Búginde Nur Otan partiiasy elimizdegi eń basty saiasi kúshke ainalǵanyn kórip otyrmyz. Osy jyldardyń ishinde partiia ishki turaqtylyqtyń tiregine ainaldy. Halyqtyń ál-aýqatyn arttyrý jolynda aianbai jumys istedi. Munyń bári partiianyń el bolashaǵyna senimi berik azamattardy biriktirýiniń arqasynda múmkin boldy. 30 jylda qandai qiynshylyqtardan ótsek te, biz elimizdi aitarlyqtai ósip-óndirdik, halyqtyń ál aýqatyn jóndedik. Jalpy, osy jyldardyń ishinde basqa ult ósip shyqty. Kózimizben kórip otyrmyz», - dedi QR Tuńǵysh Prezidenti.
Elbasy az ýaqyttyń ishinde memleket quryp, shekarany bekitkenimizdi, jańa astananyń irgesin qalaǵanymyzdy basa aitty.
«Is júzine keler bolsaq, onyń artynda qanshama atqarǵan is, jumys, qanshama qiynshylyq pen tartys jatyr. Tek Reseimen 7 500 shaqyrym shekaranyń ár shaqyrymyn shegendeý, ár aýyl tóńireginen ótý óte qiyn. Mysaly, Ózbekstanmen shekarany shegendegen kezde bir úidiń bir bólmesi Qazaqstanda, bir bólmesi Ózbekstanda qala jazdaǵan da jaǵdai boldy. Sonyń bárin sheshýge týra keldi. Shekaramyz 14 myń shaqyrym bolsa, sonyń bárin tuńǵysh ret shegendep qol qoiyp, BUU-ǵa tapsyrdyq. Shekarasy joq el memleket emes. Shekarasyz el bolmaidy», - dedi Nursultan Nazarbaev.
Sonymen qatar Elbasy taǵdyrdyń jazýymen álemniń ár qiyryna tarydai shashylǵan 1 mln-nan astam qandasymyzdy elge qaitarǵanymyzdy basa aitty.
«Ol protsess áli toqtaǵan joq. Áli de kelip jatyr. Kelemiz degen azamattardyń barlyǵyn Qazaqstan qushaq jaia qarsy alyp, múmkindiginshe kómektesedi», - dedi Elbasy.
