Qazaqstan Respýblikasynyń Prezidenti Nursultan Nazarbaev EKSPO-2017 halyqaralyq mamandandyrylǵan kórmesin jabyq dep jariialady, dep habarlaidy QazAqparat tilshisi.
Elbasy óz sózinde EKSPO kórmesiniń joǵary deńgeide ótkenin jáne Qazaqstannyń týristik tanymaldylyǵyn arttyrýǵa oń yqpal etkenin erekshe atap ótti.
«Astanadaǵy EKSPO-2017 kórmesiniń joǵary deńgeide ári tabysty ótkenin zor maqtanyshpen aitqym keledi. Bul táýelsiz Qazaqstannyń abyroiyn asqaqtatqan airyqsha jetistikterdiń biri boldy. Elorda 3 ai boiy 115 el men 22 halyqaralyq uiymnyń basyn qosqan «EKSPO» shaǵyn qalashyǵyna ainaldy. Bul Kórme Qazaqstannyń álemge tanymaldylyǵy men týrister úshin tartymdylyǵyn arttyrdy. Elimizge kelgen mártebeli meimandarǵa halqymyzdyń qonaqjailyǵyn kórsete aldyq. Bolashaqtyń energiiasyna qatysty búkil álemniń tájiribesin óz jerimizde toǵystyrdyq. EKSPO-2017 kórmesin 4 millionǵa jýyq adam aralap kórdi, olardyń 2/3 bóligi jastar men oqýshylar edi. Barshanyń nazaryn aýdarǵan ásem qalashyqqa kún saiyn 40-50 myńdaǵan adam kelip turdy. Kórmege 180 elden jarty millionnan astam adam kelip, tamashalady. Osy oraida, árbir altynshy adamnyń sheteldik bolǵanyn atap ótkim keledi. EKSPO-nyń eń tanymal ortalyǵy Qazaqstannyń pavilony «Nur Álem» boldy. Kórme bastalǵannan beri bul pavilonǵa 1 mln 300 myńnan astam adam kirip-shyqty. Dúniejúzi kóz tikken EKSPO bedelimizdi biiktetti, rýhymyzdy kóterdi», - dedi Memleket basshysy.
Aita keteiik, Astanada EKSPO-2017 halyqaralyq mamandandyrylǵan kórmesiniń jabylý saltanatyna arnalǵan mýltimediialyq shoý ótti. Saltanatty keshte keltirilgen derekterge sáikes, EKSPO-2017 kórmesine álemniń 180-ge jýyq elinen 4 millionǵa jýyq adam kelgen. Kórme pavilondaryn jai aralap shyǵýǵa 96 saǵat qajet bolǵan. Munda 3500-den astam mádeni uiymdastyrylyp, 33 myńǵa jýyq ártis óner kórsetken. Kórme aýmaǵynda 100 million fotosýret túsirilip, 88 jigit óz súiiktilerine usynys bildirgen. Sondai-aq, EKSPO-2017 kórmesinde álem ǵalymdary adamzat ómirine eleýli ózgerister ákelgen 153 jańa ónertabysty tanystyrǵan.
Eske sala ketsek, EKSPO-2017 Halyqaralyq mamandandyrylǵan kórmesi Astanada 2017 jyldyń 10 maýsymynda bastalǵan bolatyn. Ondaǵy «Bolashaq energiiasy» taqyryby energetika salasynyń qazirgi jahandyq máselelerin qamtidy. Kórmege balamaly energiia kózderi salasyndaǵy jańa tehnologiialardy usynǵan 115 memleket jáne 22 halyqaralyq uiym qatysty.
EKSPO-2017 aýmaǵyndaǵy Amfiteatrda Qazaqstannyń estrada juldyzdarynyń kontserttik baǵdarlamasy ótip jatyr.
Kórme 11 qyrkúiek kúni túngi 03:00-te tolyǵymen jabylady.
