QR prezidenti Nursultan Nazarbaev qazaqstandyqtardy Ulttyq dombyra kúnimen quttyqtady, dep habarlaidy "Ult aqparat" Sputnik Qazaqstan agenttigine silteme jasap.
Búgin elimizde alǵash ret Ulttyq dombyra kúni atalyp ótip jatyr. Prezident jarlyǵymen bekitilgen mereke shildeniń birinshi jeksenbisinde toilanady. Astanadaǵy "Qazaq eli" monýmentiniń aldyndaǵy alańda 2000-nan asa mýzykanttan quralǵan dombyrashylar orkestri óner kórsetti. Kontsertke prezident Nursultan Nazarbaev ta qatysty.
"Uly muramyzdy ulyqtaityn búgingi Ulttyq dombyra kúnimen shyn júregimmen quttyqtaimyn. Meniń jarlyǵymmen jyl saiyn osy aidyń jeksenbi kúni Dombyra kúni dep atalatyn mereke boldy. Sol jarlyqqa bailanysty tek Astanada ǵana emes,Qazaqstannyń barlyq túkprinde, oblys ortalyqtarynda, qalalarda, aýdandar men aýyldarda da búgin dál osylai Dombyra merekesi toilanyp jatyr. Dombyra qazaqtyń jany, rýhy, tarihy, salt-dástúri, búkil bitim-bolmysy dep aitýǵa bolady. Ol uly dalanyń tósinde erte zamannan beri halqymyzben birge jasap kele jatyr", — dedi Elbasy merekelik kontsertte.
Memleket basshysy qazaq jerinen tabylǵan ár jyldary tabylǵan dombyranyń tarihyna toqtaldy.
"Bir kezderi Maitóbeniń tusynan dombyranyń sýreti bar Tańbaly tas tabylǵanyn bárimiz bilemiz. Ǵalymdar ol sýret berisi 4 myń, arysy 6 myń jyl buryn bederlengenin dáleldep otyr. Aral mańynda dombyra ustaǵan adamnyń músini bizdiń dáýirimizden 4 ǵasyrdyń murasy bolsa, al Altaidan tabylǵan ata dombyra bizdiń dáýirimizden 5 ǵasyrǵa tiesili. Kórip otyrsyzdar, Altaidan Atyraýǵa deiin búkil Qazaqstannyń dalasy 4-5 myń jyldan beri osy dombyranyń únin estip kele jatyr. Ol barlyq qazaqtyń bir ekenin, qanymyzdyń da, janymyzdyń da bir ekenin dáleldeitin óte naqty nárse", — dedi Prezident.
Nazarbaev dombyra qazaqtyń brendi men pasporty ekenin atap ótti.
"Tyńdaýshysynan jigerlendiretin tókpe kúiler men syrshyl shertpe kúiler qazaqtyń tabiǵatyn tanytady. Kúmis kómei ánshilerimiz dombyrany qolǵa alyp, saiyn dalany jańǵyrtyp, áýeletip án salǵan. Qasterli aspap búginde simfoniia men operaǵa ár berip, klassikalyq ónerdiń ajyramas bólshegine ainalyp keledi. Ol qazaqtyń brendi men pasporty, eshkimge uqsamaityn qaitalanbas kelbeti", — dedi Elbasy.
Ol IýNESKO sheshimimen dombyra men kúi adamzattyń materialdyq emes mádeni muralarynyń tizimine engenin atap ótti.
"Rýhani jańǵyrý" baǵdarlamasy arqyly ulttyq mádenietimizdi álemge tanytýǵa dombyra erekshe úles qosady. Qurmanǵazy men Dáýletkereidiń, Táttimbet pen Súgirdiń, Qazanǵap pen Dinanyń kúileri tól mádenietimizdiń biregei úlgileri. Keshegi aramyzdan ótken Nurǵisa Tilendiev dombyra arqyly óziniń óshpes ónerin qaldyrdy. Olardyń bári urpaqtan urpaqqa mura bolyp jalǵasyp, halyqtyń jadynda saqtalyp keledi. Elimizde qasietti qara dombyraǵa degen qurmet eshqashan tómendegen emes. Osydan biraz jyl buryn Astaada kúi atasy Qurmanǵazynyń eskertkishi boi kóterdi. Almatyda áigili kúishi Nurǵisa Tilendievtiń eńseli eskertkishi ornatyldy. Osynyń bári dombyra men kúi óneriniń ǵasyrlar boiy dalamyzdy sazben terbetken kúishilerdi qadirleýdiń kórinisi bolyp tabylady", — dep túiindedi Nazarbaev.
.jpeg)