Nursultan Nazarbaev Birikken Ulttar Uiymynyń Bas hatshysy Antoniý Gýterrishpen kezdesti, - dep habarlaidy "Ult aqparat" Aqordaǵa silteme jasap.
Memleket basshysy BUU Bas hatshysyna Shanhai yntymaqtastyq uiymyna múshe memleketter basshylarynyń keńesine qatysqany úshin shynaiy rizashylyǵyn bildirdi.
– Shanhai yntymaqtastyq uiymynyń tarihynda BUU Bas hatshysy onyń jumysyna birinshi ret qatysýda. Sizdiń osy sharaǵa kelýińiz uiym úshin tarihi sát – ShYU-ǵa Úndistan men Pákistannyń qabyldanýymen tuspa-tus kelip otyr. Sol arqyly bul uiym aimaqtyq deńgeimen shektelmei, eleýli saiasi kúshke ainalýda, – dedi Nursultan Nazarbaev.
Memleket basshysy BUU qyzmetiniń qaǵidattary men onyń barlyq bastamalaryn Qazaqstan árdaiym qoldap kelgenin atap ótti.
– Ózińiz biletindei, Qazaqstan antiiadrolyq qozǵalystyń kóshbasshysy sanalady jáne BUU tarapynan 29 tamyz – Iadrolyq synaqtarǵa qarsy halyqaralyq is-qimyl kúni bolyp jariialandy. Men Qazaqstan tarapynan Iadrolyq qarýsyz álem jáne jahandyq qaýipsizdik úshin beriletin syilyq taǵaiyndadym. Iordaniia Koroli II Abdalla osy halyqaralyq syilyqtyń birinshi laýreaty atandy, – dedi Qazaqstan Prezidenti.
BUU Bas hatshysy Nursultan Nazarbaevty Shanhai yntymaqtastyq uiymynyń sammitin ótkizýimen quttyqtap, oǵan Úndistan men Pákistannyń múshe bolyp qabyldanýyn atap ótti.
– Men osy sammitke Shanhai yntymaqtastyq uiymynyń birte-birte búkil álemdegi yqpaldastyq ortalyǵyna ainala bastaǵanyn jete sezinip keldim. Bul uiym, meniń oiymsha, búgingi álemdik qurylymnyń mańyzdy tiregi bolyp sanalady. Úndistan men Pákistan osy basqosýda syndarly dialog júrgizý úshin jańa múmkindikterge ie bolady dep oilaimyn, – dedi A.Gýterrish.
