Qazaqstan Prezidenti «Nazarbaev Ziiatkerlik mektepteri» derbes bilim berý mekemesiniń 10 jyldyǵyna arnalǵan «Uly dala muragerleri» atty forýmǵa qatysty, dep habarlaidy "Ult aqparat" Aqordaǵa silteme jasap.
Elbasy forým bastalar aldynda Nazarbaev Ziiatkerlik mektepteri oqýshylarynyń ǵylymi jobalary qoiylǵan kórmeni aralap kórip, osy bilim berý mekemelerin odan ári damytý strategiiasy jónindegi baiandamany tyńdady.
Nursultan Nazarbaev sóilegen sózinde forýmǵa qatysýshylardyń bárin ziiatkerlik mektepterdiń 10 jyldyq mereitoiymen quttyqtap, bul mektepter elimizdiń bilim berý júiesinde erekshe oryn alatynyn atap ótti.
– Ziiatkerlik mektepter memleketimizdegi orta bilim berý júiesiniń etalonyna ainaldy. Búginde Qazaqstannyń barlyq mektepteri sizderge qarap boi túzeidi. Óskeleń urpaqtyń qazirgi zamanǵy talaptarǵa sai bolýy bazalyq bilimge tikelei bailanysty, – dedi Memleket basshysy.
Qazaqstan Prezidenti óńirlerde ashylǵan 20 ziiatkerlik mektepti qazirgi kezde 8 myńnan astam oqýshy bitirip shyqqanyn aitty.
– Elimizdegi árbir daryndy balanyń álemniń úzdik standarttary boiynsha bilim alýyna múmkindik týǵyzý biz úshin mańyzdy boldy. Onyń basty qaǵidattary – oqý úderisiniń júieliligi, maqsattardyń aiqyndyǵy jáne tájiribe júzinde oqytý, – dedi Elbasy.
Memleket basshysy bilim berýdiń ozyq ádistemelerin jáne irikteýdiń qatań júiesin engizý nátijesinde Nazarbaev Ziiatkerlik mektepteriniń oqýshylary matematikalyq saýattylyq boiynsha álemniń úzdik 10 eliniń oqýshylarynyń qataryna qosylǵanyn atap ótti.
– Búginde munda elimizdiń barlyq óńirinen kelgen balalar bilim alýda. Solardyń 3 myńnan astamy – kóp balaly jáne turmysy tómen otbasylardyń balalary bolsa, 2,5 myńy – aýyldyq jerler men shaǵyn qalalardan kelgen oqýshylar. Bul – áleýmettik ádilettiliktiń jáne árbir talantty balanyń ózin-ózi tanytýy úshin jasalǵan múmkindiktiń naqty kórsetkishi, – dedi Nursultan Nazarbaev.
Sonymen qatar, Qazaqstan Prezidenti ziiatkerlik mektepterdi ilgeriletýdiń oń qarqynyn saqtap, olardy odan ári damytýdyń jańa baǵyttaryn aiqyndaý qajettigine nazar aýdardy.
– Qazirdiń ózinde tsifrlyq tehnologiialar, bioinjeneriia jáne robottandyrý salalarynda jumys istei alatyn jańa mamandar qajet. Aldaǵy 10-15 jyl ishinde jasandy intellekt pen avtomattandyrý tehnologiialary ómirimizdiń ajyramas bóligine ainalady, – dedi Elbasy.
Sondai-aq, Memleket basshysy innovatsiialyq tehnologiialar engizý turǵysynan oqýshylardyń jańa kásipterge beiimdelýiniń mańyzdylyǵyna toqtaldy.
– Álem kún saiyn damyp keledi, únemi innovatsiialyq jáne jańa dúnieler ashylýda. Sondyqtan jyldam ózgerip jatqan ómir talaptaryna sai bolý úshin sizderge zamanaýi tehnologiialardy meńgerý qajet, – dedi Nursultan Nazarbaev.
Budan bólek, Qazaqstan Prezidenti oqýshylardyń STEAM-daiyndyǵyn kúsheitip, alǵan bilimderin jobalyq jáne zertteý jumystaryn oryndaý arqyly tájiribede júzinde qoldanýdy qamtamasyz etýdiń mańyzdylyǵy týraly aitty.
– Aǵylshyn tilinen aýdarǵanda, STEAM degenimiz – jaratylystaný ǵylymdary, tehnologiialar, injeneriia, óner jáne matematika salalary. Bir sózben aitqanda, qazirgi zamanda suranysqa ie bolyp kele jatqan pánder. Mundai pánaralyq jáne qoldanbaly ádisti qoldaný balalardy syni oilaýǵa úiretedi. Sonyń arqasynda jańashyldar men ónertapqyshtardyń jańa býyny qalyptasady, – dedi Elbasy.
Memleket basshysy tórtinshi baǵyt retinde shet tilderdi meńgerýdiń mańyzdylyǵyn atap ótti.
– Biylǵy oqý jylynda ziiatkerlik mektepterde oqýshylardyń tańdaýy boiynsha ekinshi shet tilin meńgerý qolǵa alyndy. Jahandaný jaǵdaiynda shet tilderin bilýdiń mańyzy asa zor. Tilderdi bilý basqa elderdegi adamdardyń mentaliteti men mádenietin túsinýge jol ashyp, joǵary bilim alý jáne jumysqa ornalasý barysynda tańdaý jasaý aiasyn keńeitýge múmkindik beredi, – Nursultan Nazarbaev.
Qazaqstan Prezidenti oqýshylardyń emotsiialyq intellektisin damytý máselelerine toqtaldy.
– Emotsiialyq intellekt qazirgi zamanda básekege qabiletti tulǵanyń mańyzdy qasieti sanalady. Aiasy tar tehnikalyq quzyrettilikterge qaraǵanda, adamdardy sendire alý, olarǵa janashyrlyqpen qarap, tyńdai bilý, tózimdilik tanytý qabiletteri suranysqa kóbirek ie bolady, – dedi Elbasy.
Sońynda Memleket basshysy ziiatkerlik mektepterdiń 10 jyldyq mereitoiy damýdyń jańa kezeńi jáne elimizdiń órkendeýi jolyndaǵy jańa aýqymdy jetistikterdiń bastaýy bolatynyna senim bildirdi.
– Qazirgi kezde tereń bilim alý, shet tilderin jáne zamanaýi tehnologiialardy meńgerý bárimizdiń basty mindetimiz bolýǵa tiis. Sizder sonda ǵana alǵa qoiǵan maqsattarǵa qol jetkizip, biik belesterdi baǵyndyra alasyzdar, – dedi Nursultan Nazarbaev.
Forým barysynda oqýshylar Elbasyna «ýaqyt kapsýlasyn» usynyp, atalmysh mektep túlekterine amanat hat jazyp qaldyrýdy surady.
– «Osyndai erekshe mańyzdy meiram kúni alǵashqy Ziiatkerlik mektepke «ýaqyt kapsýlasyn» tabys etkimiz keledi. Osyǵan bailanysty Nazarbaev Ziiatkerlik mektepteriniń 2068 jylǵy túlekterine amanat hat jazyp qaldyrýdy ótinemiz», - dedi atalǵan mekteptiń túlegi, Nazarbaev Ýniversitetiniń stýdenti Abylai Satylhan.
Memleket basshysy jastardyń suraýyna qoldaý bildirdi.
– «Bul, 2068 jylǵy urpaqqa arnalǵan. Qazaqta «elý jylda el jańa» degen sóz bar. Ol kezde jańa tehnologiialar bolady, adamdar 100-120 jyl jasaýy múmkin. Sondyqtan, Qudai buiyrtsa, osy jetistikterdi sol kezde kóresizder, bul hatty ashyp, oqisyzdar»,- dedi Nursultan Nazarbaev.
.jpeg)