Elbasy «Astana Hab» IT-startaptar halyqaralyq tehnologiialyq parkiniń resmi ashylý rásimine qatysty, dep habarlaidy "Ult aqparat" Aqordaǵa silteme jasap.
Memleket basshysy is-shara bastalar aldynda qazaqstandyq startap-kompaniialardyń jobalarymen tanysyp, ǵylymi-zertteý zerthanalaryn aralap kórdi, sondai-aq IT-ýniversitettiń jumysy men «Tsifrlyq Qazaqstan» memlekettik baǵdarlamasynyń iske asyrylý barysy jónindegi baiandamalardy tyńdady.
Nursultan Nazarbaev saltanatty ashylý rásimindegi quttyqtaý sózinde «Astana Hab» IT-startaptar halyqaralyq tehnologiialyq parkin resmi túrde iske qosý sharasyna qatysýshylarǵa rizashylyq bildirdi.
– Sizdermen qonaqjai ári jas elordamyz – Astanada júzdeskenime qýanyshtymyn. Ashylý rásimine qatysyp otyrǵan Estoniia Premer-Ministri Iýri Ratas myrzaǵa jáne sheteldik qonaqtardyń bárine alǵys bildiremin. Bul shara tórtinshi ónerkásiptik revoliýtsiia jaǵdaiynda Qazaqstan úshin ózekti bolyp sanalady, – dedi Elbasy.
Qazaqstan Prezidenti elimiz ben qoǵamymyzdy odan ári damytý isinde tsifrlandyrý úderisiniń máni zor ekenin atap ótti.
– Internet, jasandy intellekt, 3D-baspa tehnologiialary jáne blokchein adamzat ómiriniń búkil salasyna belsendi túrde enip keledi. Bul – qazirgi zamannyń negizgi úrdisi. Tsifrlandyrý memleketterdiń damýy men básekege qabilettiliginiń mańyzdy faktorlarynyń birine ainaldy. Búginde álemniń jetekshi elderi, sondai-aq olardyń G-20 jáne Eýropa Odaǵy siiaqty birlestikteri ózderiniń tsifrlandyrý jónindegi strategiialyq qujattaryn qabyldady, – dedi Memleket basshysy.
Nursultan Nazarbaev elimizdegi tsifrlandyrý baǵdarlamasynyń júzege asyrylý úderisi men osy baǵytta qol jetkizilgen nátijelerge arnaiy toqtaldy.
– Qazaqstan – TMD-da memlekettik qyzmet kórsetý isin elektrondy formatqa kóshirýdi birinshi bolyp bastaǵan elderdiń biri. Byltyr Qazaqstannyń úshinshi jańǵyrýyna qadam bastyq. Naqty jetistikterimiz de bar, – dedi Elbasy.
Qazaqstan Prezidenti «Astana Hab» IT-startaptar halyqaralyq tehnologiialyq parki qazirgi innovatsiialyq ekojúieniń ózegine ainalýǵa tiis ekenin aitty.
– Tehnoparktyń jumysyna qatysýshylar jeńildetilgen viza jáne eńbek rejimderin paidalana alady, sondai-aq olarǵa salyq jáne basqa da jeńildikter beriledi. Tehnopark bazasynda tálimgerlik institýty quryldy. Onyń aiasynda sarapshylar startap-komandalarǵa qamqorlyq jasaityn bolady, – dedi Memleket basshysy.
Sonymen qatar, Nursultan Nazarbaev IT-tehnologiialardy damytýǵa tartylǵan daryndy jastardy qoldaý qajettigine nazar aýdardy.
– Bizge IT-talanttardyń jańa býynyn qalyptastyrý kerek. Basty maqsatymyz – aqyldy ári qabiletti balalarǵa kómek kórsetý. Biz jeke bastamalardy, baǵdarlama jasaý mektepterin, robottyq tehnika men kiber-sportqa qatysty spartakiadalar men olimpiadalardy jan-jaqty qoldaimyz. Joǵary oqý oryndarynda oqý baǵdarlamalary jańartyldy, – dedi Qazaqstan Prezidenti.
Sondai-aq, Elbasy Qazaqstanda Biznesti jebeýshiler klýbyn (QazAngels), Venchýrlik kapitalister qaýymdastyǵyn jáne Birlese investitsiialaý qoryn qurý máselesi jóninde aitty.
Sońynda Nursultan Nazarbaev barsha jurtty innovatsiialar men tsifrlyq tehnologiialardy damytý isine belsene atsalysýǵa shaqyryp, bul salany ilgeriletý úshin zor múmkindikter bar ekenin atap ótti.
