Elbasy Nursultan Nazarbaev Aqmola oblysy Aqmol aýylynda ornalasqan «ALJIR» mýzeiinde bolyp, saiasi qýǵyn-súrgin qurbandaryna taǵzym etti, dep xabarlaidy QazAqparat.
«31 mamyrda biz saiasi qýǵyn-súrgin qurbandaryn eske alamyz. Repressiia barlyq KSRO aýmaǵynda ótti. Qazaqstanǵa keletin bolsaq, munda 103 myń adam sottalyp, 25 myńy atyldy. Qazaq ziialylarynyń qaimaǵy, el basshylary túp-tamyrymen joiyldy. Olar barsha Qazaqstan boiynsha salynǵan 11 lagerdiń qabyrǵasynda aýyr azaptardan kóz jumdy. Onda millionnan astam adam tutqynda boldy. KSRO aýmaǵynan 1,5 millionnan astam adam Soltústik Kavkazdan, Koreiadan, Baltyq elderinen, Ýkrainadan, Reseiden Qazaqstanǵa jer aýdaryldy. Osylaisha, biz kópultty elge ainaldyq. Olardyń barlyǵyna Qazaqstan týǵan úige ainaldy, qazaqtar qushaq jaia qarsy aldy. Sodan beri basymyz birlikte, tatýlyqta qosylǵan bir xalyqqa ainaldyq. Sondyqtan bul oqiǵany xalqymyz árdaiym jadynda ustaýy tiis», - dedi Prezident.
Aita keteiik, 1997 jyldan beri jyl saiyn 31 mamyr Qazaqstanda Elbasy Nursultan Nazarbaevtyń Jarlyǵymen bekitilgen Saiasi qýǵyn-súrgin qurbandaryn eske alý kúni atalyp keledi. HH ǵasyrdaǵy saiasi qýǵyn-súrgin - myńdaǵan jazyqsyz adamdardyń qany men kóz jasyna sýarylǵan tarihymyzdyń sherli betteriniń biri ekendigi shyndyq. Óitkeni, ákimshilik-jazalaýshy júie eńbektegen sábidi de, eńkeigen kárini de, bolmysy názik áieldi de aiaǵan joq. Al sol bir qasiretti jyldardy este saqtaý búgingi jáne keler urpaqtyń paryzy ekendigi sózsiz.
Eske sala ketsek, Saiasi qýǵyn-súrgin jáne totalitarizm qurbandarynyń «ALJIR» memorialdy-murajai kesheni QR Prezidenti N.Á. Nazarbaevtyń bastamasymen 2007 jylǵy 31 mamyrda Aqmol aýylynda «Otanyn satqandar» áielderiniń burynǵy Aqmola lageriniń ornynda ashyldy. Búginde aitýly memorialdyq keshen «Qaiǵy qaqpasy» monýmenti, «Kúres pen úmit» jáne «Ashyný men dármensizdik» sekildi eki músindik kompozitsiiadan, sondai-aq «Eske alý qabyrǵasynan» quralǵan. Murajaidyń ekspozitsiialary óziniń materialdyq qujattarymen saiasi qýǵyn-súrgin tarihyn, jazalaý institýttarynyń áreket etý tetikterin kórsetedi.
.jpeg)