4 qazan, sársenbi kúni memleket basshysy Nursultan Nazarbaev jumys saparymen Aqtóbe oblysynda boldy. QR prezidenti infraqurylymdyq jáne áleýmettik-mádeni nysandarmen tanysyp, sondai-aq, óńirdegi óndiristik kásiporyndarǵa bardy, -dep habarlaidy "Ult aqparat" QR prezidentiniń baspasóz qyzmetine silteme jasap.
Atap aitqanda, memleket basshysy Aqtóbe ferroqorytpa zaýytyna qarasty tsehtardyń biriniń jumysymen tanysty. Qazaqstan Prezidentine kásiporynnyń óndiristik qýaty jylyna 440 myń tonna ferroqorytpa óndirýge jetetini jóninde baiandaldy. Bul ónim Qytai Halyq Respýblikasyna, Eýropa elderi men AQSh-qa eksporttalady.
Elbasy memlekettik indýstriialyq-innovatsiialyq damý baǵdarlamasy aiasynda iske qosylǵan rels-arqalyq zaýyttyń jumysymen de tanysty. Memleket basshysyna zaýyt ónimin alys jáne taiaý shet elderge, sonyń ishinde Ózbekstanǵa, Túrikmenstan men Ázerbaijanǵa eksporttaýdyń qazirgi jaǵdaiy týraly baiandaldy. Zaýyt «Qazaqstan temir joly» ulttyq kompaniiasy» aktsionerlik qoǵamyn óz ónimimen qamtamasyz etedi. Kásiporynnyń óndiristik qýaty jylyna 430 myń tonna ónim óndirýge jetedi.
Nursultan Nazarbaev sondai-aq, ozyq úlgidegi Ultra-Clima innovatsiialyq júiesiniń qoldanylýymen salynǵan jylyjaidy aralap kórdi. Qazaqstan Prezidentine osy jobanyń kókónisti búkil óńirge jetkizý, sondai-aq ony taiaý jáne alys shet elderge eksporttaý múmkindikteri jóninde baiandaldy Kásiporynnyń ónimdilik qýaty jylyna 6 myń tonna kókónis óndirýge jetedi. Aita keteiik, «Greenhouse Kazakhstan» jylyjai kesheni «QazAgroQarjy» aktsionerlik qoǵamynyń qoldaýymen memlekettik indýstriialyq-innovatsiialyq damý baǵdarlamasy aiasynda salynǵan.
«Nur Aqtóbe» aýdanynyń aýmaǵynda nesiege beriletin ári jyldam salynatyn bir qabatty jáne eki qabatty turǵyn-úi qurylysynyń barysymen tanysqan Qazaqstan Prezidenti elimizdiń turǵyndary úshin «Nurly jer» baǵdarlamasyn iske asyrýdyń mańyzdy ekenin erekshe atap ótti.
– Halyqtyń ál-aýqatyn arttyrýda bul baǵdarlamanyń mańyzy zor. Bizdiń basty maqsatymyz – azamattardyń jaily turmysy úshin qajetti infraqurylym qalyptastyryp, olardy jumyspen qamtamasyz etý, – dedi Nursultan Nazarbaev.
Oblys ákimi Berdibek Saparbaev Memleket basshysyna «Nurly jol» jáne «Nurly jer» memlekettik baǵdarlamalarynyń iske asyrylý barysy jóninde baiandady.
Budan ózge, Memleket basshysy «CNPC-Aqtóbemunaigaz» aktsionerlik qoǵamynyń qarjysyna salynǵan jańa Óner ortalyǵyn jáne biznestiń áleýmettik jaýapkershiligin damytý baǵdarlamasy aiasynda salynǵan Shyǵarmashylyq akademiiasyn aralap kórdi.
Nursultan Nazarbaev sonymen qatar, «Jubanovtar álemi» atty jańa ortalyqta boldy. Ortalyq ataqty Jubanovtar áýletiniń kórnekti tulǵalarynyń shyǵarmashylyq murasyn dáripteý, daryndy balalardy oqytý maqsatymen salyndy.
Qazaqstan Prezidentine bul nysannyń qurylysy jeke adamdardyń qarjysy arqyly júrgizilgeni baiandaldy. Memleket basshysy elimizdiń kórnekti ǵylym jáne óner qairatkerleri – Jubanovtardyń ómiri men shyǵarmashylyǵyna arnalǵan mýzeidi aralap kórdi.
Budan bólek, Nursultan Nazarbaev oblystyń qoǵam ókilderimen kezdesti.
Elbasy «Rýhani jańǵyrý» atty baǵdarlamalyq maqalasynda atap kórsetilgen jańǵyrý úderisiniń erekshelikterine toqtaldy.
– Álem kóz aldymyzda ózgerýde, biz sol ózgeristerdiń ortasyndamyz. Jańa ǵylymdar paida bolyp, tyń kózqaras qalyptasýda. Barlyq reformalar, sonyń ishinde qoǵamdyq sanany jańǵyrtý úderisi zamandastarymyzdy jarqyn bolashaqqa daiyndaý úshin jasalýda, – dedi Qazaqstan Prezidenti.
Sondai-aq, Elbasy Astana, Almaty, Shymkent qalalarymen qatar Aqtóbe de innovatsiia ortalyǵy bolyp, óndiristik, qarjylyq jáne adami resýrstardy tartatyn faktorǵa ainalýǵa tiis ekendigin erekshe atap ótti.
– Táýelsizdik jyldarynda Aqtóbe oblysynyń halqy eki ese ósti. Osy kórsetkishti arttyrý maqsatymen munda tutas shaǵyn aýdandar men qajetti infraqurylym salynýda. Barlyq jaǵdai jasalyp jatyr. Turǵyn-úi, jol salynyp, gaz ben sý qubyrlary tartylýda. Sol siiaqty búkil Qazaqstan aýmaǵy jol jelisimen qamtylady. Mine, damý degenimiz – osy. Muny adami damý deýge de bolady, – dedi Memleket basshysy.
Kezdesý sońynda Nursultan Nazarbaev oblys turyndaryna amandyq pen baq-bereke tilep, elimizdiń órkendeýi jolynda tabysqa jetýlerine niettestigin bildirdi.
