Qostanai oblysyndaǵy Turǵyn úi qurylys jinaq banki salymshylary qoljetimdi baǵamen beriletin jańa páterlerdi bank shotyna bastapqy jarna retinde úi baǵasynyń 20%-yn jinaý arqyly satyp ala aldy. Olarǵa bank jyldyq mólsherlemesi 5% bolatyn jeńildetilgen nesie usynyp, páter iesi atanýǵa kómektesti.
Turǵyn úi qurylys jinaq banki salymshylaryna arnalǵan úiler «Nurly jer» baǵdarlamasynyń aiasynda «Aeroport» yqshamaýdanynda salynǵan. 1 sharshy metriniń baǵasy – 140 000 teńge. Memlekettik baǵdarlamaǵa qatysýshylar úshin bir bólmeli páterdiń ortasha baǵasy 5,5 mln teńgeni quraidy. Iaǵni mundai úi alamyn degen klientterge bastapqy jarna retinde banktegi shottaryna 1,1 mln teńge jinaý jetkilikti boldy.
Qostanai oblysynyń ákimi Arhimed Muhambetov pen Turǵyn úi qurylys jinaq banki basqarma tóraiymynyń orynbasary Nurlan Aqshanov aimaq turǵyndaryn merekemen jáne qonys toilarymen quttyqtady.
- Búgin Turǵyn úi qurylys jinaq banki salymshylarynyń basty armany oryndaldy – olar óz páterlerine qol jetkizdi. Baspanaly bolǵan klientterimiz jańa mektepter, balabaqshalar jáne sport keshenderi salynyp jatqan jaily aimaqta turatyn bolady. Bul Turǵyn úi qurylys jinaq bankiniń qoljetimdi ónimderiniń arqasynda múmkin bolyp otyr. Osy jyldyń 11 aiyndaǵy banktiń jalpy qazaqstandyq ipotekadaǵy úlesi 63%-dy quraidy. Barlyǵy 34 000 qazaqstandyq otbasy baspana iesi atandy, olardyń 7000-nan astamy «Nurly jer» memlekettik baǵdarlamasynyń aiasynda úili boldy. Jyl sońyna deiin áli talai klientimiz qonys toiyn atap ótetin bolady. Eldegi eń basty áleýmettik másele – azamattardy qoljetimdi baspanamen qamtamasyz etýdi tiimdi jolmen sheshýdiń aiqyn mysaly – osy, - dep atap ótti Turǵyn úi qurylys jinaq banki basqarma tóraiymynyń orynbasary Nurlan Aqshanov.
Jańa úige qol jetkizgen jandardyń arasynda bank salymshysy Ásemgúl Andriichýk te bar. Ol otbasymen birge jańa eki bólmeli páterge erteń kóship kirýge daiyn. Baspana alý úshin salymshy 4 jyl qarajat jinap, úi baǵasynyń 50%-na teń somanyń basyn quraǵan. Jetpeitin somany Qostanai turǵyny jyldyq mólsherlemesi 4,5% bolatyn zaem túrinde alǵan.
- Bul – biz úshin úlken jetistik, ómirimizdegi eń eleýli sátterdiń biri, qýanyshymyzda shek joq. Bank nesieni 7 jylǵa berdi, ai saiynǵy tólem somasy 53 myń teńgeni quraidy. Mundai aqshaǵa qazir qaladan bir bólmeli páter de jaldai almaisyń. Buryn qalanyń syrtynda turatyn edik. Jumysqa jetý úshin kún saiyn tek bir baǵytta 40 shaqyrym jol júrip ótetinbiz. Jańa úi ómirimizdi ózgertetin boldy, - dep áserimen bólisti Ásemgúl Andriichýk.
Bank salymshylaryna arnalǵan páterler taza árleýde berilip otyr. Munda kerilmeli tóbeler, linoleým, sapaly santehnika bar, jylý eseptegishteri men shaz shyǵýyn baqylaityn qurylǵylar ornatylǵan.
Qazir aimaqtyń 54 785 turǵyny baspana alý úshin Turǵyn úi qurylys jinaq bankinen shot ashyp, qarajat jinap jatyr. Olar da aldaǵy ýaqytta qoljetimdi sharttarmen turǵyn úi satyp ala alady. 2019 jyly óńirde «Nurly jer» baǵdarlamasynyń aiasynda 1 500 páter satylady. Ótinim qabyldaý týraly aqparatty banktiń Baspana.kz portalynan bilýge bolady.
