QR Úkimetinde qazaqstandyq otbasylar úshin baspana máselesin sheshýdiń jańarǵan tetikteri qamtylǵan «Nurly Jer» baǵdarlamasy talqylandy.
Ulttyq ekonomika ministri Qýandyq Bishimbaevtyń aitýynsha, baǵdarlama aiasynda ipotekalyq qaryzdardy sýbsidiialaý, qurylys kompaniialary úshin qaryz mólsherlemesiniń bir bóligin jabý jolymen jeke qurylys salýshylardy yntalandyrý, Turǵyn úi qurylys jinaq bankiniń salymshylary jáne ákimdikterde kezekte turǵan azamattar úshin nesielik turǵyn úi qurylysynyń kólemin ulǵaitý sharalary qoldanylatynyn aitty. Sondai-aq, baǵdarlama aiasynda halyqtyń áleýmettik jaǵynan osal toptary úshin satyp alý quqyǵynsyz jalǵa beriletin turǵyn úidiń óńirlik qoryn qurý, qajetti infraqurylym júrgizý arqyly jeke turǵyn úi qurylysyn damytý josparlanǵan.
«Nurly Jer» baǵdarlamasyn júzege asyrýdyń nátijesinde 1,5 mln. sharshy metr turǵyn úi salynady, onyń ishinde 2017-2019 jyldary 274 myń sharshy metr turǵyn úi salý josparlanǵan.
Endi ipotekalyq nesie 10 paiyzben beriledi
«Bul jerde Reseidiń oń tájiribesin mysalǵa keltirýge bolady. Kórshi elde ipotekalyq kredit úlesi aitarlyqtai joǵary, al ipotekany ótemeý mólsheri 5 paiyzdan tómen. Baǵdarlamanyń aldyńǵy redaktsiiasynda Biryńǵai jinaqtaýshy zeinetaqy qoryndaǵy qarajat esebinen bankterdi qorlandyrý tetikteri qarastyrylǵan bolatyn. Biraq bul tetikter Ulttyq banktiń eskertýlerinen keiin alynyp tastaldy. Ókinishke qarai, qazirgi ýaqytta bankter jai da ipoteka berýge múddeli emes», — deidi A.Raqymbaev.
Onyń aitýynsha, bankterdiń uzaq merzimge beriletin arzan aqshasy bolmaǵandyqtan, baǵdarlamada usynylyp otyrǵan sharalardy jappai qoldanysqa engizý múmkin bolmaidy.
Al baǵdarlama tujyrymdamasynda 2017 jyldan bastap halyqqa 17 paiyzben beriletin ekinshi deńgeidegi bankterdiń ipotekasyn sýbsidiialaý josparlanyp otyr. Nátijesinde qaryz alýshy úshin syiaqy mólsherlemesi 10 paiyzdy quraityn bolady.
Sýbsidiialar boiynsha qarajatty tiimdi paidalaný úshin Astana jáne Almaty qalalarynda turǵyndardy nesielendirýdiń 15 jylǵa deiin 20 mln. teńgege deiingi, al aimaqtarda — 15 mln. teńgege deiingi shekti somasy belgilenetin bolady. Osy sharttarmen nesie boiynsha ortasha ai saiynǵy tólem Astana jáne Almaty qalalarynda – 158 myń, aimaqtarda – 116 myń teńgeni quraityn bolady. Sonymen qatar jeke qurylys salýshylardy yntalandyrý úshin qoljetimdi nesielik resýrstardy paidalaný maqsatynda memleket bankter beretin nesieler boiynsha paiyzdyq mólsherlemeniń bir bóligi sýbsidiialanady.
Jaldap turatyn úiler salynady
«Nurly jer» baǵdarlamasy aiasynda óńirlerde kezekte turǵan adamdar arendalyq turǵyn úilerdi satyp alý quqyǵynsyz ala alady. 15 jyldyń ishinde Óńirlerde satyp alý quqyǵynsyz jalǵa beriletin turǵyn úi qoryn qurý úshin 2017 jyldan bastap respýblika boiynsha jyl saiyn 25 mlrd. teńge bólý josparlanǵan. Jalǵa beriletin turǵyn úiler JAO kezeginde turǵan halyqtyń áleýmettik jaǵynan osal toptaryna arnalǵan. Olar 1-toptaǵy múgedekter, jetim balalar jáne taǵy basqa. Baǵdarlama júzege asyrylatyn 15 jyl ishinde Arendalyq turǵyn úi qory 45 myń páter nemese 2,2 mln sharshy metr baspanany quraidy.
"Egemen Qazaqstan" gazeti
