«Nurly Jer» baǵdarlamasyna 200 mlrd teńgeden astam qarjy bólinedi. Bul týraly búgin Úkimettiń selektorlyq rejimdegi otyrysynda «2018-2020 jyldarǵa arnalǵan respýblikalyq biýdjet týraly» Zań jobasyn tanystyrǵan QR Qarjy ministri Baqyt Sultanov málim etti, dep habarlaidy Ult.kz tilshisi QazAqparat agenttigine silteme jasap.
«2018 jyly ekonomikanyń naqty sektoryn damytýǵa 1,4 trln teńge kózdelgen. Aǵymdaǵy jylmen salystyrǵanda shyǵystar kóleminiń azaiýy eki negizgi faktorǵa bailanysty boldy.
Birinshiden, baǵdarlamalardy qarjylandyrý kózderiniń Ulttyq qordan beriletin nysanaly transfertten munailyq emes kiristerge ózgertildi, iaǵni kelesi jyldary Respýblikalyq biýdjettiń kózderinen qarjylandyrylatyn bolady. Ekinshiden, kvazimemlekettik sektor sýbektileriniń aǵymdaǵy jáne kelesi jyldyń biýdjet qarajatyn igerý boljamdary esepke alyndy», - dedi ol.
Ministrdiń dereginshe, «Nurly Jol» baǵdarlamasyn iske asyrýdy jalǵastyrýǵa 512,6 mlrd teńge, odan 2018 jylǵa 243,3 mlrd teńge somasynda shyǵystar kózdeldi. Al «Nurly Jer» turǵyn úi qurylysy baǵdarlamasyna 208,8 mlrd teńge, odan 2018 jylǵa 125,2 mlrd teńge baǵyttaý usynylyp otyr.
«Agroónerkásip keshenin damytý baǵdarlamasy boiynsha 2018 jylǵa 195 mlrd teńge kózdeldi. Bul shyǵystar qarjy qyzmetteriniń (sýbsidiialardyń) qol jetimdiligin arttyrý jónindegi is-sharalarǵa, sý sharýashylyǵyn jáne veterinariiany damytýǵa, fitosanitariialyq qaýipsizdikti qamtamasyz etýge baǵyttalatyn bolady. Indýstriialyq-innovatsiialyq damý memlekettik baǵdarlamasynyń ekinshi kezeńin iske asyrýǵa jalpy somasy 232,9 mlrd teńge, onyń ishinde 2018 jylǵa 76,1 mlrd teńge kózdelgen», - dedi B.Sultanov.
Onyń aitýynsha, 2018 jyly kólik infraqurylymyn damytýǵa 292,6 mlrd teńge jumsalatyn bolady. Memlekettiń qorǵanys qabileti men qaýipsizdigin, quqyq tártibiniń saqtalýyn qamtamasyz etýge jáne ishki turaqtylyqty qoldaýǵa 2018 jyly shyǵystar 1 088,9 mlrd teńgeni quraidy.
«Respýblikalyq biýdjet tapshylyǵy jalpy ishki ónimge qaraǵanda 2018 jylǵy 1,1 paiyzdan 2019-2020 jyldary 1 paiyzǵa tómendeitin bolady. Bul memlekettik borysh kólemin shekti deńgeide saqtaýǵa múmkindik beredi», - dedi ol.
.jpeg)