«Nurly jer» memlekettik baǵdarlamasy aiasynda biyl Aqtóbe oblysy, Áiteke bi aýdanynyń halqyna 297 jer telimin berý josparlanǵan. Onyń 257-i aýdan ortalyǵyna, ózgesi aýyldarǵa tiesili. Óńir basshysy Berdibek Saparbaev aýdanǵa sapary kezinde jer alý úshin 10 jyl boiy kezek kútip júrgen turǵyndarǵa qujattaryn tapsyrdy, dep habarlaidy Bnews.kz tilshisi.
Aqtóbeniń Áiteke bi aýdanynda 26 myńnan astam adam turady. Onyń 900-ge jýyǵy jer telimin alyp, úi salýǵa aryz bergen eken. Alǵashqylary osydan 10 jyl buryn jospar qurǵanymen, jer telimi biyl taratylyp jatyr.
«Osydan 25 jyl buryn biz oilaǵan joq edik, Komsomol kentinde temir jol salynady, ortalyqtandyrylǵan sý qubyry tartylyp, gaz keledi, zaman talabyna sai tas jol tóseledi dep. Biz táýelsizdigimizdiń arqasynda óz bailyǵymyzdy ózimiz paidalanyp, ózimizdiń ekonomikalyq saiasatymyzdy júrgizip jatyrmyz. Halyq turmysynyń jaqsarýyna bailanysty úkimetke, jergilikti bilik ókilderine tapsyrma berildi. Jer alamyn degen adamǵa jer berip, infraqurylymyn jasaýdy mindettedi. Áiteke bi aýdanynda 900-ge jýyq adam jer alýǵa aryz bergen eken. Keler jyly jer kezegindegi barlyq adamǵa jer ýchaskesi berip, úi salýyna múmkindik jasalýy qajet»,-deidi oblys ákimi Berdibek Saparbaev. Óńir basshysy jastarǵa úlken úmit artatynyn aityp, erinbei eńbek etýge shaqyrdy.
Jer telimi qujatyn alǵandardyń biri Bairambai Patshaev. Ol 10-jyldan astam ýaqyt boiy jer ala almai júr.
«Men 2005 jyldan beri Áiteke bi aýdanynyń turǵynymyn. Otbasymyzben temirjol salasynda eńbek etip júrmiz. Biz táýelsizdigimizdiń 25 jyldyǵynda qýanyshqa kenelip otyrmyz. Elbasymyzdyń kóregen saiasatynyń, «Nurly jer» baǵdarlamasynyń arqasynda biyl jer teliminiń qujaty tapsyryldy. Qýanyshtysy, jer ýchaskesinde gaz, jaryq, sý bar»,- dedi aýdan turǵyny Bairambai Patshaev.
Aita keteiik, Aqtóbe oblysynda 130 myńnan astam adam jer kezeginde tur. Basym bóligi Aqtóbe qalasyna úi salýdy maqsat etken.
«Aýdanda biyl 288 jer telimi daiyn tur. Elektr jelisi tartylyp, sý qubyry júrgizildi. Gaz da kelip jatyr. Al 2017 jylǵa 251 jer telimi daiyndaldy»,- deidi Áiteke bi aýdandyq turǵyn úi-kommýnaldyq sharýashylyǵy, sáýlet, qala qurylysy bóliminiń bas mamany Erlan Shaǵataev.
.jpeg)