Úkimet Memleket basshysynyń óńdeý ónerkásibine investitsiialar tartý men importty almastyrý jáne lokalizatsiialaýdy arttyrý jónindegi tapsyrmalaryn júzege asyrý aiasynda Aqtóbe qalasynda Ónerkásip jáne qurylys ministrligi men Aktobe Steklo JShS arasynda shyny ydystar óndiretin zaýyt salý boiynsha investitsiialar týraly kelisimge qol qoiýdy maquldady, dep habarlaidy ult.kz.
Tiisti qaýlyǵa Premer-ministr Oljas Bektenov qol qoidy.
Kásiporys qurylysyn 2026 jyldyń IV toqsanynda bastaý, al ony paidalanýǵa berý 2029 jylǵa josparlanyp otyr. Investitsiialardyń jalpy kólemi 60 mlrd teńgeni, jobalyq qýattylyǵy – jylyna 256 mln birlik shyny ydys óndirýdi quraidy.
Qazirgi ýaqytta Aqtóbe oblysynda shynydan jasalǵan ónimniń ózindik óndirisi joq. Jańa zaýyt otandyq shyny ydystyń óndirisin ulǵaitýǵa jáne onyń ishki naryqtaǵy usynysyn keńeitýge múmkindik beredi. Kásiporyn ónimderiniń 80%-na deiin Qazaqstanda satý, qalǵan bóligin Ortalyq Aziia elderiniń naryqtaryna shyǵarý josparlanýda.
Óndiris shikizatty suryptaýdyń, tehnologiialyq úderisterdi basqarýdyń jáne sapany baqylaýdyń zamanaýi avtomattandyrylǵan júielerimen jaraqtandyrylatyn bolady. Ónimdi shyǵarý kezinde otandyq tabiǵi mineraldy shikizatty, sondai-aq qazaqstandyq óndirýshilerdiń taýarlaryn, jumystary men qyzmetterin paidalaný josparlanýda.
Joba sonymen qatar qaitalama shikizatty paidalanýdy birtindep arttyrýdy kózdeidi. Jobany qarjylandyrý kezeńinde olardy óndiriste qaita paidalana otyryp, 245 myń tonnadan astam shyny qaldyqtaryn qaita óńdeý josparlanýda.
Joba aiasynda 300-ge jýyq turaqty jumys orny ashylady. Qazaqstandyq mamandar úshin úzdiksiz oqytý jáne biliktilikti arttyrý kózdelgen.
Kásiporynnyń iske qosylýy tamaq jáne qaita óńdeý ónerkásibi tarapynan qosymsha suranys týǵyzady: otandyq shyny ydystyń usynysyn ulǵaitý jetkizý merzimderin qysqartýǵa jáne aralas salalardaǵy kásiporyndardy jabdyqtaýdyń turaqtylyǵyn arttyrýǵa múmkindik beredi. Qaitalama resýrstar sektory da damidy – eń aldymen, shyny synyqtaryn jinaý, suryptaý jáne keiinnen olardy qaita óńdep, óndiriste qaita paidalaný úshin shoǵyrlandyrý baǵytynda jumys júrgiziledi.
