QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda «Nurly jer» memlekettik turǵyn úi qurylysy baǵdarlamasyn iske asyrý barysy jáne 2020-2025 jyldarǵa arnalǵan jobasy qaraldy.
Atqarylyp jatqan jumystar týraly QR indýstriia jáne infraqurylymdyq damý ministri B. Atamqulov, «Báiterek» UBH» AQ tóraǵasy A. Áriphanov, Qyzylorda oblysynyń ákimi Q. Ysqaqov, Aqtóbe oblysynyń ákimi O. Orazalin, Atyraý oblysynyń ákimi N. Noǵaev jáne Nur-Sultan qalasy ákiminiń orynbasary N. Nurkenov baiandady.
Memlekettik baǵdarlama júzege asqan 2017 jyldan bastap turǵyn úi qurylysy salasyna 3,3 trln teńgeden astam investitsiia salyndy, onyń 85% — jeke investorlardyń qarajaty. 300 myńǵa jýyq otbasyny baspanamen qamtamasyz etýge múmkindik bergen 33,5 mln sharshy metr turǵyn úi salyndy.
Baǵdarlamada alǵash ret kóp balaly otbasylar men jumys isteitin jastarǵa arnap jaldamaly turǵyn úi salý, tabysy tómen otbasylarǵa jeńildikti ipoteka, jeke qurylys salýshylarǵa sýbsidiia berý siiaqty jańa mehanizmder iske asyryldy.
Qyzylorda, Aqtóbe jáne Túrkistan oblystary turǵyn úi qurylysy boiynsha kóshbasshy óńirler, Pavlodar, Atyraý, Mańǵystaý oblystary jáne Nur-Sultan qalasy artta qalýshy jáne qarajatty igerýde problemalary bar óńirler.
«QR Tuńǵysh Prezidenti – Elbasy N. Nazarbaev “Nurly jer” baǵdarlamasyn iske asyrýdyń mańyzdylyǵyn, onyń turǵyn úi qurylysyna myqty serpin beretinin erekshe atap ótti», — dedi A. Mamin.
Premer-Ministr osy jyldyń josparly kórsetkishi — 13 mln sharshy metr turǵyn úidi paidalanýǵa berýdi qamtamasyz etýdi tapsyrdy.
«Memleket basshysy Qasym-Jomart Toqaev óziniń sailaýaldy baǵdarlamasy men Qazaqstan halqyna arnaǵan Joldaýynda qoldanystaǵy turǵyn úi baǵdarlamalaryn biryńǵai turǵyn úi saiasaty aiasynda biriktirip, 2025 jylǵa deiingi “Nurly jer” memlekettik baǵdarlamasyn ázirleýdi tapsyrdy», — dedi A. Mamin.
«Nurly jer» turǵyn úi-kommýnaldyq damytýdyń jańa memlekettik baǵdarlamasy jylý jáne sýmen jabdyqtaý, sý tartý, kommýnaldyq sektordy jańǵyrtý, 2015-2019 jyldarǵa arnalǵan «Nurly jol» memlekettik infraqurylymdy damytý jáne 2020 jylǵa deiin óńirlerdi damytý baǵdarlamalarynyń aiasynda úilerdi jóndeý máselelerin biriktiredi.
Premer-Ministr jańa «Nurly jer» memlekettik baǵdarlamasy árbir qazaqstandyqqa turǵyn úi máselesin óziniń tabys deńgeiine qarai sheshýge múmkindik beretinin atap ótti.
Jobada turǵyn úi problemasyn sheshýmen qatar, halyqty sapaly aýyz sýmen qamtamasyz etý, turǵyn úi-kommýnaldyq sharýashylyq infraqurylymyn jańǵyrtý, turǵyn úi qoryn jóndeý de kózdelgen.
A. Mamin Memlekettik baǵdarlamany osy jyldyń sońyna deiin qabyldaýdy qamtamasyz etýdi tapsyrdy.
.jpeg)