QR Parlamenti Májilisiniń spikeri Nurlan Nyǵmatýlin «Nur Otan» partiiasynyń sailaý naýqany aiasynda Qaraǵandy oblysynyń kenshilerimen kezdesti. Partiia baǵdarlamasynyń basymdyqtary týraly Kostenko atyndaǵy shahta aldyndaǵy kezdesýde aityldy, dep habarlaidy "Ult aqparat".
Kezdesýde eń aldymen, eńbek jaǵdailary, onyń qaýipsizdigin arttyrý jáne óndiristik jaraqattanýdy azaitý týraly áńgime boldy. Nurlan Nyǵmatýlin atap ótkendei, bul máseleler árqashanda «Nur Otan» partiiasynyń baqylaýynda.
«Elbasy, «Nur Otan» partiiasynyń Kóshbasshysy Nursultan Ábishuly Nazarbaev shynaiy eńbektiń qadirin biletin kenshiler men metallýrgterge árdaiym nazar aýdaryp keledi. Bizdiń partiiamyz joǵaryda atalǵan máselelerdi sheshýge, sonymen birge zańnamalyq deńgeide retteýdi qolǵa alatyn bolady. Memleket Basshysy Qasym-Jomart Kemeluly Toqaevtyń jumyspen qamtý saiasatyn iske asyrý sheńberinde partiia laiyqty jalaqy men halyqtyń tabysyn arttyrýdy basym baǵyt retinde qarastyrady», - dedi Nurlan Nyǵmatýlin. Qazirgi ýaqytta eńbekkerlerdiń qorǵalýy máseleleri Eńbek kodeksiniń, ónerkásiptik qaýipsizdik týraly zań jobasynyń quqyqtyq normalarymen, avariialyq-qutqarý qyzmetterin attestattaýdy engizýmen bekitilgen.
Áleýmettik qoldaý, turǵyn úi, óndiristi jańǵyrtý týraly áńgime Kostenko kenishinde jalǵasty.
Qazaqstandyqtardyń turǵyn úi máselelerin sheshý baǵytynda «Nur Otan» partiiasy 103 mln sharshy metr turǵyn úi salýdy josparlap otyr. Turǵyn úiler paidalanýǵa berilgen kezde kópbalaly jáne áleýmettik qorǵalmaǵan azamattarǵa basymdyq qarastyrylady.
Sonymen qatar áleýmettik tólemderdi jyl saiyn indeksteýge 3 trln.teńgeden astam qarajat bólinedi.
Nurlan Nyǵmatýlinniń aitýynsha, osy baǵyttardy iske asyrý jalpy el ekonomikasyn damytý úshin, onyń ishinde Qaraǵandy oblysynyń áleýetin aitarlyqtai nyǵaitýǵa múmkindik beredi.
Sondai-aq, «Nur Otan» ár óńir úshin investitsiia tartýdyń, óńirdiń salalyq mamandanýyn eskere otyryp, jobalardy iske asyrýdyń indikatorlaryn belgileýge nietti. Budan basqa, Qazaqstanda óz kiristerin saqtaý jáne qaita investitsiialaý úshin investorlardy yntalandyrý boiynsha sharalar qabyldanatyn bolady.
