Búgin QR Qorǵanys ministri Nurlan Ermekbaev Túrkiia Qorǵanys ministri Hýlýsi Akarmen kezdesti, dep habarlaidy QazAqparat.
«Jumys kesteńizdiń tyǵyzdyǵyna qaramastan ýaqyt bólip, bizge Qorǵanys ministri retinde alǵash ret kelip otyrsyz. Sol úshin rizashylyǵymyzdy bildiremiz. Biz dostastyǵy jarasqan elderimiz arasyndaǵy stretegiialyq áriptestikti nyǵaitýǵa úles qosyp, ony damytýymyz kerek. Bizdiń jan-jaqty yntymaqtastyqtyǵymyz ben áriptestigimizdiń negizi, árine, eki memlekettiń kóshbasshylary arasyndaǵy senimdi jáne óte jaqyn dostyq qarym-qatynas sanalady», - dedi kezdesý barysynda Nurlan Ermekbaev.
Óz kezeginde Túrkiia Qorǵanys ministri kesheden beri qonaqjailyq kórsetip jatqan Qazaqstan tarapyna zor rizashylyǵyn bildirip ótti.
«Árine, atajurtymyzǵa kelý biz úshin óte mańyzdy ári qazaq jerine taban tiregennen keiin-aq ortaq tarihymyzdyń tamyry qanshalyqty tereńde jatqanyn sezindik. Baýyrlas qazaq elinde bolyp jatqan barlyq oqiǵalardy jiti baqylap otyrmyz. Ortaq tarihymyz, ortaq mádenietimiz jáne bizderdi jaqyndastyra túsetin dúnieler óte mańyzdy. Baýyrlas elderdiń kóshbasshylary arasyndaǵy bailanystar jumysymyzdyń jemisti bolýyna septigin tigizip otyr. Áskeri saladaǵy yntymaqtastyǵymyz odan ary nyǵaia túsetindigine senimim mol», - dedi Hýlýsi Akar.
QR Qorǵanys ministri túrik áriptesimen osydan 2 jyl buryn Elbasy Nursultan Nazarbaevtyń Túrkiiaǵa sapary barysynda Ankara qalasynda kezdeskenderin jáne sol kezde mańyzdy qujattarǵa qol qoiǵandaryn eske salyp ótti.
«Atap aitqanda, áskeri saladaǵy yntymaqtastyq týraly jáne qupiia málimetterdi saqtaý týraly kelisimdi rásimdedik. Bul sapar ekijaqty jáne kópjaqty yntymaqtastyqty nyǵaitýǵa jaqsy serpin berdi. Al joǵary deńgeidegi strategiialyq keńes - bul yntymaqtastyqtyń negizgi baǵyttaryn aiqyndaityn negizgi qural bolyp sanalatyndyǵyn atap ótkim keledi. Qazaqstan men Túrkiia arasynda ekijaqty syndarly dialogpen qatar kópjaqty yntymaqtastyq ta qarqyndy damyp keledi. Bizdiń elderimiz BUU, IYU, EQYU, AÓISShK aiasynda belsendi túrde yntymaqtastyqty damytý ústinde. Eki eldiń bastamasymen túrki tildes memleketterdi jaqyndastyratyn óte mańyzdy saiasi jáne mádeni uiym - Túrki keńes quryldy», - dedi Nurlan Ermekbaev.
