Din isteri jáne azamattyq qoǵam ministri Nurlan Ermekbaev "Astana" arnasyna suhbat berip, eldegi dini ahýal tóńireginde sóz qozǵady.
"Memleket basshysy din salasynda oryn alyp otyrǵan máselelerdi sheshýdiń pármendi jolyn tabýdy tapsyrdy. Zańnamalyq ózgeristerge keler bolsaq, eń aldymen memlekettiń din salasyna kózqarasynyń júiesin qalyptastyrý kerek dep esepteimiz. Osyǵan bailanysty eń aldymen ministrlik sol memlekettik din salasyndaǵy saiasattyń tujyrymdamasyn ázirledi. Bul tujyrymdama kóptegen sarapshylar men dintanýshylardyń oi-pikirlerin, usynystaryn eskerip, keń talqylaýdan ótti. Qazir tujyrymdama daiyn, jaqyn arada úkimettiń talqylaýynan ótip, bekitiletin bolady dep úmittenemiz. Din salasyndaǵy memlekettik saiasattyń tujyrymdamasy bolashaq zańdarǵa ózgertýler negizi bolady", - deidi Nurlan myrza.
Bul rette elde dástúrli emes dini aǵymdardyń taralýyna bailanysty týyndaǵan birqatar problemalalarǵa toqtaldy.
"Qazir biz destrýktivti aǵym dep kez kelgen radikaldy fanatizmge negizdelgen, Qazaqstanǵa jat jat dini aǵymdardy aityp otyrmyz. Biraq olardyń ishinde qazirgi tańda eń ózekti - ol salafizm degen radikaldy aǵym. Destrýktivti dini aǵym, mysal úshin salafizm bolsyn, olar qatelik dini túsinikterdi bizdiń tarihi dástúrlerimizden, mádenietimizden, bizdiń halqymyzdyń kóp etnosty, konfessiialyq sipatynan joǵary qoiady. Olar tek shariǵatqa, baiaǵy ejelgi dini talaptarǵa negizdelgen memlekettiń qurylysyn durys júie dep esepteidi. Mundai shetin ideialar san ǵasyrlyq tarihymyzǵa, san ǵasyrlyq mádenietimizge qaishy keletini sózsiz. Shetelderden belgili bir sheihterden signal kelse, ol kez kelgen ýaqytta qolǵa qarý alyp, óz jerlesterine, úkimetke, memleketke qarsy shyǵa alady. Sondyqtan olarǵa senim degen joq. Ministrlik memlekettik quzyrly organdarmen birlesip, zańsyz ýaǵyz júrgizip, zańyz ádebiet taratyp, zańsyz dini jiyndarǵa jol bermeý baǵytynda keshendi jumystar atqarylyp keledi", - dedi ministr.
Sondai-aq, júrgizilip jatqan jumystarǵa toqtalyp, ministrliktiń aldaǵy baǵyt-baǵdary týrasynda aityp berdi.
"Eki baǵytta jumys júrgizilip keledi. Din salasyna qatysty durys sipattaǵy bilim berý. Ekstremistik ideologiiany jaqtyrmaityn kózqaras qalyptastyrý. Ekinshi baǵyt - ol maqsatty reabilitatsiialaý. Ol eń aldymen ekstremizm úshin sottalǵan jazasyn óteýshi men olardyń otbasy múshelerimen jumys júrgizý. 2016 jyldyń ishinde 70 adam burynǵy qatelik dini kózqarastan, dini raiynan qaitty. 150 adam qatelik dini senimge kúmándandy", - dedi ol.
Nurlan Ermekbaev shet elde dini bilim alýǵa ketken jastar haqynda da óz oiyn ortaǵa saldy.
"Shetelde jekelegen dini bilim berý oqý oryndaryna ketken, óz betterimen ketken jastardyń radikaldy dini aǵymnyń yqpalyna túsýi ábden múmkin. Shetelderdegi túrli dini bilim berý ieleri solar arqyly qoǵamdy basqarýdy qalaidy. Sondyqtan bizdiń usynysymyz, jastar eger shetelge dini bilim alýǵa barǵylary kelse, olar aldymen Qazaqstan musylmandary dini basqarmasyndaǵylarmen aqyldasyp, joldama alyp, shetelge barsa bolar edi. Eger óz betterimen shetelge baryp bilim alsa, QMDB olardy jumysqa qabyldamaidy", deidi bul rette.
